Dan loa zángnadawmna lak tum an awm, Revenue Minister thu lo chuan tih chi a ni lo - ZLP Leader Lalduhoma

ZPM Legislature Party (ZLP) leader Lalduhoma chuan, Vairengte leh Sairang inkar kawng four lane-a siam turah dan loa periodic patta siama zángnadawmna lak tum an awm thu sawiin, "Revenue Minister thu lo chuan tih chi rual a ni lo," a ti.

Lalduhoma hian nimin khan Aizawl Press Club-ah thuthar thehdarhtute a kàwm a; press meet an neih chhan sawiin, "Vawiina sawi ka tum thil pahnih chungchangah hian nimina tawp ta Assembly session-ah motion put luh tumin Assembly Speaker ka dil a, vawi hnih min hnâwlsak tak avangin tunah hian sawi a ṭul phah ta a ni," a ti.

ZPM Leader sawi danin, Vairengte leh Sairang inkar kawngpui four lane-a siam turah June 1, 2020 khan khatih laia Land Revenue & Settlement (LRS) secretary R Lalramnghaka'n notification a tichhuak.

LRS Secretary chuan notification-ah, NH-6 leh NH-306 kam metre 100 huam chhunga ram neitute chu thla hnih chhunga update vek tur te, chumi baka ram àwl la awmte chu khawih danglam theih tawh loh tura vawn ṭhat vek a nih thu te, ram àwl chhungah pass dil thar leh zauh (extention) dil phal a nih tawh loh thute a tarlang.

Notification bawhzui hian ram neitute tihchian hna chu peih a nih tak thu te, Bhoomirashi Portal-a thun theih a nih thu leh buaina a awm lo tih hriatpuina atan January 27, 2021 khan Kolasib Additional DC, Project Engineer, Transys Consulting Pvt. Ltd., Kawnpui VC I, II leh III, Venglai VCP leh Bualpui VCP-te'n hming an ziak.

Kawng laitu tur NHIDCL pawhin zangna­dawmna dawng turte chu an portal-ah an dah lut a, Ministry of Road Transport & Highways-in zangnadawmna dawng turte hming leh an pass number-te chu Gazette of India-ah notification an chhuah a ni.

Zangnadawmna dawng turte chhinchhiah vek a nih hnuah Aizawl lam aṭangin mi 16-in Bilkhawthlir North VCP seal lem leh signature lem hmangin Kolasib-a LRS office-ah periodic patta siam an tum thu sawiin Lalduhoma chuan, "Bilkhawthlir Joint VC-te'n FIR an thehluh tâk avangin an siam thei ta lo a ni," a ti.

ZLP Leader chuan, thuneitu sangin periodic patta lem siamna atana kawng dâltu nia an ngaih Revenue Secretary, Kolasib LRS office-a Settlement Officer leh Assistant Surveyor-te chu an transfer tih a sawi a, "Reve­nue Secretary tharin February 8, 2021 khan notification tichhuakin, Kolasib district notified town chhunga sorkar remtihna loa pass neite leh valid document nei lote pawh an pass regularise sak vek tur a ti ta a ni," a ti.

Lalduhoma chuan, Kolasib Settlement office-ah surveyor paruk dah (attach) an nih thu sawiin, "Settlement Officer thar chuan Kawnpuia periodic patta diltu mi 71-te dilna chu August 13, 2021 hmaa chinfelsak turin detailment order an siam ta a ni," a ti a; surveyor-te'n an pute thupek angin periodic patta thar siam hna an thawk char char tih a sawi.

Zangnadawmna dawng tur list an kawl vek tawh hnuah leh Gazette of India-a chhuah tawh hnua zangnadawmna dawng tur tihbelh tumna chu NHIDCL-in an pawm thei ang em tih chu zawhna a nih thu sawiin Duhoma chuan, "Tuirial Hydel Project-ah zangnadawmna dawng tur thun belh avangin harsatna lian tak a thleng tawh a ni," a ti.

ZPM leader Lalduhoma chuan, dik lo taka thil tih a nih theihna atan ruahmanna hrang hrang - officer transfer, dan loa pass neitute regularise sak tura thupek leh surveyor rual tirhte a awm thu sawiin, "Hengte hi Revenue Minister thu lo chuan tih chi rual a ni lo tih a chiang khawp mai," a ti a; LRS Minister bakah MLA pahnih pawh an phusa hlea a hriat thu a sawi.

Lalduhoma chuan, Manipur pawh tur kawngpuiin a tan tlang tur khuaah te, a bik takin Pàwlrángah zangnadawmna tinzawna VC pass thar siam a tam thu a sawi bawk a, "Pawlrang rama kawngpuiin a tan tlang tur ram neitu ramah Aizawl lam mi pakhatin in seipui a sa. He in hi hmanna tur eng mah awm lo, a ruak ringawt a ni. Zangnadawmna dawn tum vanga sak nia hriat a ni," a ti.

Mizoram sorkarin Covid-19 a do dan pawh sawiin Lalduhoma chuan, "Covid-19 second wave tuar nasa ber zinga mi kan ni. Thilpek pawh kan dawng mawlh mawlh a, a lawmawm tak zet," a ti a; Mizorama thilpek petu zingah India Formosa Foundation chu a thawh hlâwk ber niin, cheng vbc. 22 man an pek tawh thu a sawi.

ZPM Leader chuan, DDK-in India Formosa Foundation President an kawmnaah, RT-PCR mobile van a thlàwna pek an duh thu Mizoram sorkar hnenah an thlen tih a ngaihthlak thu a sawi a, "Mizoramin RT-PCR laboratory pakhat chauh kan neih avang leh kan mamawhna a sàn em avangin kha thu khan kan beng a verh hle a, kan ngaihven zui a, RT- PCR mobile van hi cheng vbc. 2 man a ni," a ti.

India Formosa Foundation hotu chuan RT-PCR mobile van pek an duh thu June 14, 2021 khan Health Minister hnenah a thlen tih sawiin Lalduhoma chuan, "Kan lo nghahhlel tehlul nen, thla thum a ral hnuah pawh Health Minister hian a ngaihven zui ta miah lo. Hei hi sual - crime lian tak a tlingin kan hria," a ti a; RT-PCR mobile van chu chàn mai a hlauhthawnawm tih a sawi.

GISAID database-in a tarlan danin, February 2021 khan Mizoram aṭanga sample an endikna aṭangin Delta Variant kai mi paruk an awm tih tarlan a ni tawh tih sawiin Duhoma chuan, "May-ah phei kha chuan 52 ngawt an awm tawh angin an tarlang ngam tawh a ni. February thlaah Delta Variant kái kan awm tawh tih GISAID pawhin an tarlan ngam tawh hi kan sorkar hian engtin nge a hriat loh theih?" a ti.

ZPM Leader chuan, Mizoramah Delta Variant kai an awm tawh tih Mizoram sorkarin official-a April 2021-a a hriat hnuah pawh a puangzar mai duh lo tih sawiin, "June 16, 2021 khan ZPM chuan thuchhuah siama kan puanzar tâk avangin June 18, 2021 khan loh theih lohin sorkar chuan Delta Variant awm thu a puangzar ve ta chauh a ni," a ti a; mipui hnena thu dik hrilh ngam loah sorkar a puh a ni.