World Suicide Prevention Day hmang ; Kum 10 chhungin Mizoramah mahni intihlum 938

Nimin September 10 kha World Suicide Prevention Day a ni a, he ni pual hian Hospital & Medical Education (HME) directorate conference hall-ah hun hman a ni.

Kum 2011 aṭanga July 2021 thlengin Mizoramah mahni intihlum mi 938 an awm tih tarlan a ni.

Health & Family Welfare depart­ment-in a kalpui mek National Mental Health Programme (NMHP) hmalaknaa World Suicide Prevention Day hmannaah hian Health department-a thawkte bakah Mizoram University-a Psycho­logy department mite an tel a; Psychiatry head of department Dr C Lalhrekima'n kaihruaiin, HME joint director Dr Lalmalsawmi'n a hmanpui.

Psychiatrist Dr Ruth Lalmuanpuii chuan, mahni nunna lâk tumte nuna langsar ber chu beidawnna a nih thu sawiin, "Beidawnna aṭanga hruai chhuak tur chuan rinnaa thlir a ngai a, awm mai mai chuan a lo chhuak thei lo a, thil tih neih a ngai. Rilru lam dam lohna nei leh a ṭanpuitute hian tih tur kan nei ve ve. Psychiatrist leh counsellor-te tih tur bik a ni lo a, mi tinin kan bul vela mite kan ṭanpui thei a, harsatna neia kan hriatte biak pawh a, an harsatnate ngaihthlaksak tur a ni," a ti.

Aizawl SP C Lalruaia tarlan danin, kum 2011 aṭanga July 2021 thlengin Mizoramah mahni intihlum mi 938 an awm tawh a, chu'ng zingah chuan kum 20-40 inkar an tam ber. Kum 10 chhunga Mizorama mahni intihlum zingah Aizawl district-a mi an tam ber a, 51% an tling.

Mahni intihlum zingah rilru lam natna neih vanga mahni intihlum tam berin, 36.3% an ni a, 25.6% chu zu leh ruihhlo kaihhnawih a ni. Inngaihzawnna leh chhungkaw lam vanga intihlum chu 14.5% an ni a, a dang 23% chu chhan hriat loh a ni thung. Kum 2015 kha mahni intihlum tam ber kum a ni a, mi 113-in an nunna an la a ni.

World Suicide Prevention Day hi September 10-ah khawvel pumah hman a ni ṭhin a, kumina thupui chu 'Creating hope through actions' (Thil tih hmanga beiseina siam) tih a ni.