Harsatna neite inhriattir rang turin chah

Health minister Dr R Lalthangliana hoin nimin khan HME conference hall-ah Mizorama Covid-19 veite enkawl dan sawiho a ni a; Covid-19 vei, mahni ina inenkawl te, CCC leh CCCC-a inenkawlte chu uluk taka inchîk reng tur leh harsat­na an neih chuan a rang thei ang bera doctor hnena hriattir turin an chah.

Mizorama Covid-19 vei damlote enkawlna atan sorkar laipuiin inkaihhruaina a duan zawm a nih thu te, sorkar laipui inkaihhruaina chu Mizoram tana ṭha thei tur ang berin her rem hret hret ṭhin a nih thu te, hripui veite enkawlna atana mamawh damdawi ṭhate chatlak loa kawl reng a nih theih dan turte an sawi a ni.

SRH-ZMC-a ICU khum indaih lohna phuhru turin Civil Hospital, Aizawlah ICU khum 10 ruahman a nih thu tarlan a ni a, "Vawiin (September 10)-ah company technician-te'n oxygen line-te an endik fel chuan hman nghal thuai theih a ni ang," an ti a; damlote'n harsatna an tawh veleh zêp loa doctor an hriattir thuai a ṭul thu an sawi bawk.

Health Minister chuan, Mizoramah Covid-19 vei an la pun zel thu sawiin, "Kan tum ber leh sorkar laipui pawhin min tehna pawimawh ber pakhat chu hri kai zinga nunna chân (case fatality rate) kan tam leh tam loh a ni a, Pathian khawngaihna vang leh kan zavaia kan ṭanrual vangin a ti ṭha berte zingah kan la tel," a ti.

Ṭhutkhawmah hian Covid-19 Medical Opera­tional Team chairman Dr ZR Thiamsanga, MLA, Health department hotu te, Covid-19 vei damlo enkawltu doctor te, Indian Medical Association, Non-Government Hospital Association of Mizoram, Association of Physicians leh Aizawl Civil Hospital aiawhte an tel.