Remna awm theih dan tur sawiho

Mamit DC Dr Lalrozama, Karimganj DC Khargeswar Pegu leh Hailakandi DC Rohan Kumar Jha te chuan nimin khan video conferencing kaltlangin Mizoram leh Assam inkarah remna leh muanna awm theih dan tur an sawiho a, a ṭul anga hmalakho an rêl.

Bawrhsap pathumte chuan, ramri leh a chhehvelah harsatna a awm loh nan theihtawp chhuaha hmalak ni se, ramria buaina a awm palh pawha a punlun zel loh nan tlang takin chanchin inhrilhtir tawn ṭhin ni se an ti.

Mizoram leh Assam ramria buainate chu district thuneitute rèl fel theih a nih loh avangin tuna dinhmun thlen chinah chuan intibuai tawn loa inzah tawn taka khawsakho ni se, an ti a; state level meeting-in a rêl angin DC pathumte'n boruak ṭha a awm zel nan thla tin meeting ni leh hun bik siama ruat ni se, online platform hrang hrang hman ṭangkai ni se, an ti bawk.

Mamit DC hi Mamit SP Vineet Kumar leh IPRO Paul Rokima ten an ṭawiawm a; Hailakandi DC chu Hailakandi SP Gaurav Upadhyay-a'n a ṭawiawm a ni.