Cancer vei enkawlna sorkarin ngai pawimawh: CM

Chief minister Zoramthanga chuan Covid-19 hripui léng mek karah Mizoram sorkarin cancer veite enkawlna lam a ngai pawimawh a, theihtawp chhuah a nih thu a sawi.

CM Zoramthanga hian September 9, Ningania Mizoram State Cancer Insitute (MSCI), Zemabawka cancer hemna khawl lian, Truebeam Liner Accelerator (LINAC) a hawnnaah thu sawiin, "Cancer enkawlna leh mipui hriselna sorkarin a ngai pawimawh a, inenkawlna tihchangtlun leh tihhmasawnna atan neih ang ang hman zel a ni ṭhin. Covid-19 léng mekah pawh sorkarin theihtawp a chhuah a ni," a ti.

Health minister Dr R Lalthangliana pawhin thu sawiin, "JICA nen thawhhona thuthlung ziaka cheng vbc. 500 hmanga Cancer Super Specialty Hospital din tura hmalakna tluang takin a kal zel," a ti a; cancer hemna kháwl thar chu a mamawhtute'n ṭangkai taka an hman a duhsak thu a sawi.

Sorkar thuchhuah tarlan danin, cancer hemna kháwl thar - TrueBeam LINAC hi USA-a company Varian Medical System siam a ni a, a bun nan cheng vbc. 17 sèn a ni. Radio isotope hmang loa radiation dose sang tak, electricity hmanga siam chhuak thei a ni. Khawl hian cancer cell bikte chauh a hem a, a bulhnaia timûr hrisel a khawih tel dawn lo. Cancer vei state páwna thawn ṭhin tam tak chu khawl thar hmangin a enkawl theih tawh dawn a ni.

MSCI-ah hian cancer enkawlna telecobalt machine leh TrueBeam LINAC a awm a, brachytherapy khawl hman thuai theih tura bun a nih tawh bakah, supporting unit -X ray leh CT scan, etc. a awm bawk.