Cong-in mipui hruai sual an tum - MNF

MNF party chuan thuchhuah siamin, Congress party-in Power & Electricity minister R Lalzirliana an bei chhunzawm zel chu mipui hruai sual tumnaa an ngaih thu an tarlang.

MNF chuan, JERC-in power tariff a tihsan dawna public hearing an kohah Congress party-te an kal duh lo a, tariff sawisel theih hunah an sawisel lo nia sawiin, "Nikum 2020-21-a electric bill sànna 26.59% a nih khan an sawisel lo a, kumin 2021-22-ah 20.70%-a a pun tlem zawknaah an sawisel leh si hi mipui hmakhaw ngaih lohna leh Power Minister beih duhna hrim hrimah kan ngai a, mipui hruai sual tumna maiah kan ngai," an ti.

Minister R Lalzirliana chu Assembly House-a thu dik sawi ngam loa MPCC-in an puh leh báng tura an phût nawn chungchangah MNF chuan, "Power Minister khan zawhna ho kha a chháng fiah fai chiang tawh hle zawk a ni. Bill tihsual palh zeuh hi chu khawvel a nih miau avangin a awm lo thei lo a, digit khan lek chhut sual palh pawhin a sang viauin a hniam duai thei bawk," an ti a, tih dik loh luih a awm ngai lo niin an sawi.

MNF chuan, electric bill-a sorkarin subsidy a pekah mirethei KJS, BPL family-te chu unit khat zelah 50%-in ngaihhnathiam an nih thu leh domestic-ah 27.04% chauh an pe niin an sawi a; state dangte dinhmun nena khaikhinin Mizoram mipuiin electric bill an la chawi tlem zawk niin an sawi bawk.