Health Minister thusawi zahthlak an ti

Mizoram Pradesh Congress Committee (MPCC) chuan thuchhuah siamin, September 9, Ningania Legislative Assembly session-ah Health minister Dr R Lalthangliana thusawi chu zahthlak an tih thu leh Assembly House leh Mizoram mipui zah lohna dik taka an ngaih thu an tarlang.

MPCC chuan Health Minister thusawi chung­chang tarlangin, "Mizoramin Covid-19 kan do dan a ṭha thawkhat a tih thu a sawi a, India ram dangte nena khaikhinin Mizoram dinhmun a ziaawm hle tih a sawi bawk. Total lockdown vawi 19 leh partial lockdown vawi 11 puang tawh chunga Covid-19 donaa Mizoram dinhmun dik tak ngaihtuah chuan a zahthlak tak zet a, House zahawm tak leh Mizoram mipui zah lohna dik tak a ni," an ti.

Mizoram aia a lêt tam taka mipui tamna India ram state tam zawkah Covid-19 an dang chat a, nunphung pangngaiin an nung tawh tih sawiin MPCC chuan, "Sikul leh college-te an hawn leh tawh laiin Mizoram chu hri vei pun tamna ber state-te zinga mi kan la ni reng a, khawvela lockdown puang rei ber kan nih tawh hnuah pawh hri vei zat a la tlahniam thei lo," an ti a; economy, sumdawnna leh zirnain a tawrh nasat dan tur chhût thiam phak a ni lo tih an sawi.

State leh UT tam zawkin Covid-19 an thunun tawh tih sawiin MPCC chuan, "Vei thar tam ber pawl ni reng chunga Health Minister-in 'Mizoram sorkarin hripui a do dan a ṭha thawkhat,' a la ti thei te, 'India ram dangte nena khaikhinin Mizoram dinhmun a ziaawm hle,' a la ti theite hi a mak tak zet a, mipui bum tumna leh zah lohna dik tak a ni," an ti.

Covid-19 chung­changah Mizoram dinhmun a ṭha lo hle chungin sample endikna rintlak ber RT-PCR laboratory pakhat chauh a la awm thu leh dedicated covid hospital pakhat chauh a la awm thu sawiin, state dangte hmalak dan nena khaikhinin Mizoram sorkar hmalak dan chu zahthlak khawpa ṭha lo a nih thu an tarlang.

Hripui léng kaih­hnawiha Mizoram dinhmun a ṭha lo hle chungin Health Minister chu hna thawk ṭha tak angin a inlantir thei zel tih sawiin MPCC chuan, "Mipui thlàwpna a dawng ṭha hle chunga hripui donaa a hlawhchham chianzia leh mipui tawrhna nasatzia hriaa zahawm taka Health Minister a nihna aṭanga inthiarfihlim turin kan ngen nawn leh a ni," an ti.