Covid-19 vei hmuh thar tam lamah State/UT 36 zingah Mizoram 5-na

Mizoram chu India ram state zinga September 9, Ningania Covid-19 vei hmuh chhuah tam lamah pangana a ni a, hripui vei enkawl mek tam lamah parukna a ni. Hmarchhak state bikah hripui vei hmuh thar leh enkawl mek tamna ber a ni zui zel bawk.

September 9 khan Mizoramah Covid-19 vei mi 1,055 hmuh belh a ni a, a záwnin ni li chhung mi sang khat aia tam hmuh chhuah ni tawhin, chawhrualin September thlaah ni tin mi 1,002 chuang hmuh chhuah an awm ang a ni. Ningania Mizoram aia hripui vei hmuh tamnate chu - Kerala (26,200), Tamil Nadu (1,596), Andhra Pradesh (1,439) leh Karnataka (1,074) a ni. Maharashtra-a hmuh zat tarlan a ni lo.

Nimin chawhma lam dinhmun angin, Mizorama Covid-19 vei enkawl mek chu mi 12,440 an ni a; Mizoram aia enkawl mek tamna state-te chu - Kerala (2,36,903), Maharashtra (51,364), Karnataka (17,019), Tamil Nadu (16,221) leh Andhra Pradesh (14,624)-te an ni.

India hmarchhak state pariat zingah Mizoram chu chawlhkar hnih chuang ni tin hripui vei hmuh tam berna a ni tawh a, September 9-ah pawh Mizorama hmuh zat 1,055 chanve hmuh tlinna state dang a awm lo.

Hripui vei enkawl mek zatah pawh Mizoram chu hmarchhak state zingah a sáng fál a, state dangte chu Mizorama enkawl mek 12,440 zatve awm tlin lohna vek a ni tawh. Covid-19 vei hmuh chhuah tawh zat aṭanga enkawl mek tam lam percentage-ah phei chuan Mizoram a sang fál lehzual a ni.