Hripui vangin mi 233 thi tawh

September 9, Ningani tlai/zan khan Covid-19 vei enkawl lai thi mi pahnih an awm belh a, nimin khan mi pakhat a thi leh bawk. Sorkar chhinchhiah angin, nimin tlai dar 5 thleng khan Mizoramah hripui vangin mi 233 an thi tawh.

Covid-19 vei Maj. C Chhuanvawra (80), Bethlehem Vengthlang chu September 9 tlai dar 5:25 khan an inah a thi a, nimin khan vui a ni. Covid-19 positive a ni tih September 6 khan hmuh chhuah a ni a, damdawi-inah enkawl a ni lo a, an inah an inenkawl a ni.

Ningani zan dar 10:05 khan hripui vei Lalrimawii (40), Kolasib Vengthar chu State Referral Hospital panpui a nih laiin a thi. Covid-19 vei a ni tih August 31 khan hmuh chhuah a ni a, Kolasib District Hospital-a hun eng emaw chen enkawl a nih hnuah SRH-ZMC-ah enkawl turin Ningani zan khan hruai a ni a, kawng lakah a thi a ni.

Nimin chhun dar 11:35 khan Vanlalsiama (23), Siaha College Vaih-II chu Covid-19 vangin SRH-ZMC-ah a thi a, hripui vanga thi 233-na a ni. Covid-19 positive a ni tih August 14 khan hmuh chhuah a ni a, August 17 aṭangin SRH-ah enkawl a nih thu sorkar thuchhuakin a tarlang.