ZPM Ṭhalaiin House-a dawt sawia an puh EFCC Minister thupha chawi turin phût

ZPM Ṭhalai chuan thuchhuah siamin, Mizoram Pollution Control Board (MPCB) chairman lak dan an dem thu an tarlang a; Environment, Forest & Climate Change (EFCC) minister TJ Lalnuntluanga chu Assembly House-ah dâwt a sawi avangin thuphá cháwi turin an phût.

ZPM ṭhalaite chuan, EFCC minister TJ Lalnuntluanga'n MPCB chairman chu Recruitment Rules hman mek siam a nih hmaa lâk a nih thu Assembly House-ah a sawi tih tarlangin, "MPCB Chairman RR hi July 30, 2021 khan sorkarin chhuahin, he dan kalh hian MPCB chairman hi August 3, 2021 khan ruat a ni thung. Mahni dan siam ngei kalha hna lak hi a pawi kan ti a, MNF sorkarah dikna leh thiamna aiin, induhsak biknain hmun a luah thûkzia a lang chiang hle," an ti.

Minister-in state rorelna kháwla dâwt chiang tak awlsam taka a sawi chu mipui ngaihnêpna a nih thu sawiin ZPM Ṭhalai chuan, "Khatianga dâwt sawi kha chief whip inti tan phei chuan thil mawi lo tak a ni a, mipui hnenah ngaihdam dil turin kan phût," an ti a; tun hnuah tisual leh tawh lo turin an chah bawk.