KHAWTHLIR

Thisen pe
LIKBK Ṭhalai Pawl, Mampui Bial chuan nimin khan Lawngtlai District Hospital tan thisen unit 43 an pe a, petute mipa 33 leh hmeichhia 10 an ni. KṬP, Armed Veng Branch pawhin Aizawl Civil Hospital tan an kohhran hall-ah thisen unit 30 an pe a, petute mipa 24 leh hmeichhia paruk an ni. Civil Hospital Blood Bank-ah mahnia a thlawna pe mi 16 an awm bawk.

MNF Nomination Committee din
Mizo National Front president Zoramthanga chuan Tuirial Assembly Constituency-a by-election awm tur atan Nomination Committee member tur a ruat a, September 14, 2021-ah ṭhutkhawm nghal an tum. Nomination Committee member-te chu MNF elected office bearer-te bakah - Dr R Lalthangliana, K Lalrinliana, Lalchhandama Ralte, Lalruatkima, Lalrinsanga Ralte, R Rohmingthanga leh Harvey Lalrinliana te an ni.

Swab endik rûnpui
Aizawlah swab sample endik rûnpui kalpui chhunzawm zel a ni a; September 9, Ningani khan Ṭhuampui leh Ramhlun North-ah neih niin, mi 3,149 endik zingah Covid-19 vei mi 171 (5.43%) hmuh chhuah a ni. Ṭhuampuiah mi 2,079 endik niin, hripui vei mi 157 (7.55%) hmuh a ni a, symptom nei mi 43 an awm. Ramhlun North-ah mi 1,070 endik aṭangin hripui vei mi 14 (1.30%) hmuh a ni a, symptom nei mi panga an awm a ni.

Chhawmdawlna Ngaihtuah mek
AH&Vety minister Dr K Beichhua chuan MNF member Lawmawm Tochhawng zawhna ziaka chhangin, African Swine Fever vanga vawk chántute'n chhawmdawlna an hmuh theih dan ngaihtuah mek a nih thu a tarlang. Minister tarlan danin, State Disaster Relief Fund aṭanga chhawmdawlna an dawn theih nan ASF chu calamity-a puang tura hmalak mek a ni a; July 31, 2021 thlenga vawk suat tawh tana zangnadawmna dilna Ministry of Fisheries, Animal Husbandry and Dairying-ah thehluh a ni.