Myanmar ráltlân mi eng emaw zat Mizoramah an rawn luh belh mek

Tun hnaia Myanmar ram chhunga Chin state-ah Myanmar sipaite leh tualchhung mite nasa taka an inbeih avangin sahimna zawnga tlânchhia mi eng emaw zat Mizo­ramah an rawn luh belh a, an luhna khaw­tlangte'n chhawmdawl hna an thawk mek.

Thingsai VC president PC Lalremkunga'n Vanglaini palai a hrilh danin, tun hnai têa Myanmar rama inbeihna a thlen hmain Thingsaiah Myanmar ráltlân mi 200 chuang hret an awm sa a, kar hmasaa inbeihna avangin mi eng emaw zat luh belhin, nimin thleng khan mi 400 chuang an awm tawh a, a zat chiah erawh an la hre thei lo.

Myanmar aṭanga Thingsai khuaa lutte chu Thingsai aṭanga Myanmar nena inrìna Ṭiau lui lirtheia pawhna Bungkhawkai kaltlangin an lut a; mi 400 chuang khaw chhungah an awm mek bakah, nimin zing thleng khan Ṭiau lui Bungkhawkaiah hian chhungkaw 30 chuang an awm mek. Nimin chhûn lamah pawh luh belh an awm zel a, lut zat chiah hriat theih a la ni lo tih PC Lalremkunga chuan a sawi.

Thingsai VCP chuan, a hma lama Myanmar ráltlân an neihte chu tum lawka lut, bungrua leh ei leh in turte pawh a theih ang anga keng an nih thu a sawi a, "Tuna an inkahna avanga rawn tlânchhiate erawh chu rikrum thila rawn tlânchhia an ni a, chhawmdâwl an ngai zual hle a ni," a ti.

PC Lalremkunga chuan, ráltlânte chu mimal in, sorkar in leh vantlang inahte an awmtir tih sawiin, "Tun dinhmunah chuan rawn luh belh zel se, awmna tur kan nei tawh lo. Relief camp 10 kan nei sa a, eng emaw zat kan sak belh a ngai ang," a ti a; ráltlânte chu khawtlangin ei leh in tur an pek thu leh Bungkhawkaiah pawh buhfai ip 10 vel an dah sa thu a sawi. Ráltlân luh belh chungchang chu Hnahthial DC-ah an thlen tawh thu a sawi bawk.

Bungkhawkai aṭanga lui hnâr lama Lungdâp chhuah kaltlangin ráltlân mi eng emaw zat an lut bawk a; September 10, Zirtawpni aṭanga nimin thleng khan mi 30 vel an lut tawh.

Thu dawn danin, Lungdap chhuah kaltlanga lutte chu Myanmar rama Lunglêrh, Leisen leh Thantlang mite an ni tlangpui a; New Ngharchhip bakah, Ngharchhip leh Cherhlun khuaahte an awm a ni.

Lungdâp chhuah kaltlang hian September 10 khan mi 70 velin Ṭiau lui an kân a, New Ngharchhip YMA president Lalhruaitluanga hoin khawtlangin an buaipui nghal a, ei tur, thosi lên, silpauline leh ṭul dangte an pe a, khuaah lut nghal loin, Ṭiau lui hnaiha thlám paliah an riak.

September 11, Inrinni khan Lungdâp chhuahah hian ráltlân mi 200 vel an luh belh leh a, Zirtawpnia lutte nena an awmna turin New Ngharchhip community hall buatsaih a ni. Lungdap chhuah kaltlanga ráltlân rawn lut mi 300 vel zinga mi 100 vel chu New Ngharchhipah an awm a, mi dangte erawh chu khaw hrang hrangah an kal darh thung.

New Ngharchhipah hian September 10 aṭanga ráltlân rawn lut tharte bakah ráltlân mi 160 vel an awm sa bawk. Hetih lai hian, Champhai district-a Tuipuiral huam chhunga khaw hrang hrangah pawh tun hnaiah ráltlân mi 300 vel an luh belh tawh tih Tuipuiral Group YMA secretary B Challianngura chuan Vanglaini a hrilh a, "Hripui léng nen kan buai khawp mai," a ti.