Mi 288-in PPE 14,400 an ṭhui mek

Mizoram sorkarin tualchhunga kut themthiamte tana a ruahman, 'Scheme for support of local artisans who lost their sources of livelihood due to Covid-19 pandemic/lockdown' hnuaia Commerce & Industries department-in Aizawla puanṭhui thiamte personal protective equipment (PPE) a ṭhuitir thawh hnihna kalpui mek a ni a, mi 288-in PPE 14,400 an ṭhui mek.

Mizoram chhunga puanṭhui thiamte'n PPE an ṭhui thawh khatnaah 21,600 ṭhui niin, Health department hnenah pek a ni tawh a; a thawh hnihnaah hian PPE 14,400 ṭhui leh a ni dawn a, Mizoram sorkarin PPE ṭhui tura a tìra a ruahman 36,000 chu ṭhui zawh a ni ang. PPE ṭhui thawh thumna a awm dawn leh dawn loh hriat a la ni lo.

Commerce & Industries (CI) department hotute chuan Vanglaini palai zawhna chhángin, PPE ṭhui thawh hnihna chu tunkai tàwp lamah zawh hman an beisei thu an sawi a, "September 9 khan a ṭhuitu turte hnenah PPE bungrua kan sem kim. Covid-19 léng kara awm kan ni a, puan ṭhui thiamte zingah hri kai an awm leh zauh ṭhin. Chutiang harsatna kan tawh loh chuan ṭhui zawh vat a, Health department kuta hlan thuai kan tum," an ti a; PPE mamawhna a sàn avangin ṭhui zawh hmasak apiang Health department hnenah an hlan ṭhin thu an sawi. (Phek 2-ah zawm a ni)