CLP-in New Market-a sumdawngte ngaihven thuai turin sorkar an phût

Congress Legislature Party (CLP) member-te chuan Septem­ber 11, Inrinni khan New Market building sak ṭhat tum mek an tlawh a; sumdawngte harsatna tawh mek ngaihven thuai turin Mizoram sorkar an phût.

CLP chuan, New Market-ah sumdawng pawl hrang hrang 65 an awm thu tarlangin, "New Market behchhan hian chhung­kaw 2,240 chuang eizawng an awm a, hripui léng avang leh an eizawnna hmun ṭhiah darh a nih avanga an harsatna tawh mek hi a namailo hle. Ngaihthaha ngawih bopui emaw, hriat loh der a hun tawh lo tak zet a ni," an ti.

Congress sorkar lai aṭangin Bazarpui chu a tahtawla sak ṭhatna tur ruahman a ni tawh tih sawiin CLP chuan, "A chhunga eizawngtu te, seat nghet nei chhungkua 1,093 bakah ni tina inzuar ve dang mi 800 chuangte an buai lutuk loh nan an insawn chhuahna tur building dang sak belh a ni," an ti a; Bazarpui building-a awmte pawh a tahtawla sawn an nih thu an sawi.

CLP chuan, MNF sorkar hnuah ruahmanna leh remruatna fel nei si loin building pui ber ṭhiah a nih thu sawiin, "A sak ṭhatna tur sum pawh a la awm lo tih a changtu minister berin a sawi tih Bazarpuia sumdawng pawl hrang hrang 50 chuangte'n June 28, 2019-a Chhinga Veng YMA Hall-a an meeting thuchhuahah an tarlang hial a ni," an ti.

CLP tarlan danin, New Market sak ṭhat tuma ṭhiah takah dawr 1,328 a awm a; tuna sak ṭhat mek Foreign Lane tih ṭhinah dawr 235 vel a awm. In chu kum 2018-a inthlanpui hmain ṭhiah a ni a, sak ṭhat leh nghal mai tura ruahman a ni. Chutih lai chuan in thar sak lama hmasawnna awm si loin June/July 2020 khan dawr sang khat chuang awmna chu ṭhiah leh a ni bawk.

New Market building ṭhiah a nih lai hian sum awm sa, ṭhiah zawh veleha sak nghal leh mai tur anga sawi a ni a; mahse, tun thlengin hmalakna thar hmuh tur a la awm loh avangin dawr neitute chuan hriatthiam har an ti tak zet tawh tih an sawi a ni.