Tlawva SHP enchhin pahin hman ṭan a ni

Kawlphetha megawatt 5 pe chhuak thei tura siam Tlawva Small Hydel Project (SHP) chu enchhin mek a ni a, tun thla chhungin zawh hman beisei a ni.

Tlawva SHP enkawltu Power & Electricity (PE) department hotute chuan Vanglaini palai zawhna chhangin, a siamtu company Nortech Power Project, Kolkata-a mithiamte'n kháwl an enchhin mek thu an sawi a, "Megawatt 2.5 pe chhuak thei khawl pahnih zinga pakhat zawk an enchhin zo tawh a, pangngai takin a hman theih tawh. Khawl pakhat dang an buaipui leh mek a, tun thla chhunga zawh tum turin kan hrilh," an ti a; hawn hun tur an la hriat theih loh thu an sawi.

PE department hotute chuan, tui a awm ṭhat chuan Tlawva SHP-a kháwl pakhat chu an hman ve reng thu an sawi a, "Test run vek a la ni rih a, load kan pe a nih pawhin a khawl hnathawh dan an enfiah pah reng a ni. Tunah chuan khawl hman theih tawh hi a pangngai rih viau a, a siam chhuah theih tâwk tura duan megawatt 2.5 pawh a pe chhuak thei," an ti.

Tarlan tawh angin, South Khawbung RD block huam chhunga Tlawva lui hmanga kawlphetha siamna, Tlawva SHP hi a taka hman theih turin 2020 kum tàwp lam khan peih a ni tawh a, tui a tam tâwk loh vanga hun eng emaw chen a hnathawh theih dan enchhin theih a nih loh hnuah July 2021 tàwp lam aṭang khan company mithiamte'n an enchhin ṭan a ni.

Tlawva SHP hi cheng vbc. 73.40 hmangin Nortech Power Project-in an siam a, kawlphetha megawatt 2.50 siam thei kháwl pahnih vuah niin, khawl pahnih hmangin megawatt 5 a siam chhuak thei dawn.

PE department leh contractor inremna angin SHP hian chhum lo chat loa darkar 700 chhung megawatt 5 a pek theih hnuah chauh contractor-in kháwl chu department-ah a hlan dawn a; tunah hian megawatt 2.5 siam thei khawl pakhat chuan pangngai takin hna a thawk thei tawh a, khawl pakhat zawk enchhin mek a ni.