MNF-in thu dik lo sawiah Duhoma an puh

MNF chuan thuchhuah siamin, ZPM Legislature Party leader Lalduhoma'n September 10, 2021-a thuthar thehdarhtute a kawmnaah Health department chungchangah thu dik lo a sawi niin an tarlang.

India Formosa Foundation emaw, hmun dang emaw aṭanga duhsaktute thilpek Health department-in a hnar ngai lo nia sawiin MNF chuan, "RT-PCR mobile van neih tumin hma a la reng zawk. Kuminah ringawt pawh RT-PCR mobile van dilna central sorkarah Mizoram sorkar chuan a thlen ngun tawh hle a, rei lo têah fel tura beisei a ni," an ti.

MNF tarlan danin, India Formosa Foundation-in Mizoram tan RT-PCR mobile van pek an duh thu an rawn thlen tawh ngei a, uluk deuha ngaihtuah a nih hnuah leh Mizoramah hman theih nia an hriat hnuah Chief Minister-in September 2, 2021 khan a ṭul anga hma la turin India Formosa Foundation-ah DO letter a thawn a ni.

Chief Minister leh Health Minister bakah, Health Secretary pawhin Ministry of Science & Technology, Institute of Bioresources & Sustainable Development (IBSD) hnenah ziakin dilna a thlen tawh a; chumi hnuah Health Minister-in vawi hnih, Chief Minister-in vawi khat lehkhain an chhu zui tawh niin an tarlang bawk.

MNF chuan, March 2021 khan whole genome sequencing (WGS) ti turin sample 69 thawn a nih thu tarlangin, "March vêk khan result dawn a ni a, Covid-19 virus hrik thar hmuh a ni lo. April thlaah sample 217 thawn a ni a, chu'ng zinga sample 76 result chu June 18 khan dawn a ni a, a tûkah official spokesperson-in IPR kaltlangin a puang nghal. TV chanchin thar leh chanchinbu lamah pawh chhuah a ni," an ti.

Kumin June thlaa sample 100 thawn result chu July 20-ah dawn a ni a, a tûkah official spokesperson-in IPR kaltlangin a puang leh nghal tih sawiin MNF chuan, "Integrated Health Information Platform (IHIP)-a dah luhte chauh hi official report-ah ngaih a ni," an ti. Delta Variant bakah, Alpha Variant leh Eta Variant pawh a hlauhawmzia mipuia zirtirna kawngah sorkarin kawng hrang hrangin hma a la reng niin an sawi bawk.