Union Health Minister lo zin a tum - Mizoram BJP

BJP, Mizoram Pradesh chuan, September 10, 2021 tlai khan an president Vanlalhmuaka'n Union Health minister Mansukh L Mandaviya a kâwm a, an President sawmna angin Mansukh Mandaviya chu Mizorama rawn zin ngei a tum thu an tarlang.

Mizoram BJP thuchhuah tarlan danin, Vanlalhmuaka hian Union Health Minister hnenah hian Covid-19 avanga Mizoramin a tawrh mek dan leh Mizorama health infrastructure a ṭhat tâwk loh thute a thlen a ni.

Mansukh L Mandaviya chuan, sorkar laipuiin Mizoram a ngaihsak thu te, Covid-19 dona hmanrua pawh India-in ram dang aṭanga a dawnte Mizoram tana an pek dan te, PM Cares fund kaltlanga oxygen siamna district tina bunna tur an pek thu te, tun hnaia India hmarchhak biala Covid dona atana sum an pek dante leh Mizorama Covid vaccine leh damdawi dang an pek dante a sawi lang.

Union Health Minister chuan, hriselna chungchang chu state kuta awm a nih avangin state sorkarin tun aia nasaa hna an thawh a ngaih thu a sawi a, "Covid-19 hripui do hneh tur chuan Chief Minister hoa beih a ngai a ni," a ti.