Covid-19 vangin mi pali thih belh

September 11, Inrinni leh nimin Pathianni khan Mizoramah Covid-19 vei mi pali an thi a, September thla ni 12 chhungin mi 20 an thi tawh. Sorkar chhinchhiah angin, hripui vangin Mizoramah mi 237 an thi tawh a ni.

Covid-19 vei enkawl lai Thangmawia (52) h/o Vanlalramzauvi, Venghnuai chu September 11, Inrinni zing dar 9:20 khan State Referral Hospital-ah a thi a, Inrinni chhun dar 1 khan Rokunga Hall-ah vui a ni. Amah hi mîta lungte awm a ni a, Covid vaccine a la lo. Covid-19 positive a ni tih August 30, 2021 khan hmuh chhuah a ni a, SRH-ZMC-ah enkawl nghal a nih thu sorkar thuchhuakin a tarlang.

Inrinni tlai dar 3:10 khan Vanlaldika (61) s/o T Chhawnkima (L), Laipuitlang chu hripui vangin SRH-ah a thi. Covid-19 vei a ni tih August 28-ah hmuh chhuah a ni a, SRH-ZMC-ah enkawl nghal a ni. Vanlaldika hi MNF Gen. Hqrs.-ah secretary, Laipuitlang LC treasurer leh Aizawl City Local Council Association vice president a ni mek a ni.

Nimin zing dar 4:05 khan LT Thana (76), Ṭhuampui, Aizawl chu Covid-19 vangin SRH-ZMC-ah a thi a, nimin khan vui a ni. Covid-19 positive a ni tih August 30, 2021 khan hmuh chhuah niin, SRH-ah enkawl nghal a nih thu sorkar thuchhuakin a tarlang.

Nimin zing vêk dar 7:50 khan Lalremmawii (36) w/o Ngurchhuana, Edenthar Veng, Aizawl pawh Covid-19 vangin SRH-ZMC-ah a thi a, hripui vanga Mizorama thi 237-na a ni. Covid-19 vei a ni tih September 8 khan hmuh chhuah niin, a tuk September 9 aṭangin SRH-ah enkawl a ni a; nimin khan YMA Hall-ah vui a ni.