KHAWTHLIR

Thisen pe
KṬP, Himali Pastor Bial chuan September 11, Inrinni khan Synod Hospital-ah thisen pek huaihawtin, thisen unit 18 an pe a, petute mipa 17 leh hmeichhia pakhat an ni.

Restricted tender-in Hna 61 pek a ni
PWD enkawltu chief minister Zoramthanga chuan Assembly session neih zawh takah khan INC member pahnih Nihar Kanti Chakma leh C Ngunlianchunga te zawhna ziaka chhángin, December 2018 aṭangin Mizoram PWD hnuaiah restricted tender hmangin hna chi hrang hrang 61 pek a nih thu a tarlang.

Damdawi-in tanpui
World Vision India, Lawngtlai chuan September 10, Zirtawpni khan Siaha District Hospital-ah khum, âwngphah, lukham leh lukham káwr 10 ṭheuh an pe a; World Vision aiawhin Siaha DC Kesavan R chuan medical superintendent Dr C Lalrosanga hnenah a hlan a ni.

Gas bûk tling lo man
Siahaa Legal Metrology enforcement squad chuan September 10, Zirtawpni khan Tipa Agency-in Siaha aṭanga Zyhno (Zawngling) khuaa eirawngbawlna gas sem tura an phurh zinga bûr 115 chu bûk tling lo a ni tih an hmu chhuak. Eirawngbawlna gas-te chu MZ-05 7566 hmanga phurh thlen a ni a, truck khalhtu Ajmal chu dan anga hrem a ni.

Sangha no sem
Fisheries department chuan September 10 khan SEDP hnuaiah Aizawl district-a khaw pariata sangha khawitute hnenah sangha no 5,00,000 leh Saitual district khaw pangaa sangha khawitute hnenah 2,00,000 an sem. Sangha no semte chu Indian major carp chi thum leh exotic carp chi thum inpawlh a ni.