COVID-19: Mizoram dinhmun ; Hripui vei 70,840 hmuh a ni tawh

September 11, Inrinni thleng khan Mizoramah Covid-19 vei mi 70,840 hmuh chhuah a ni tawh a, Mizorama mihring cheng zat (2011 chhiarpui angin) 10,91,014 aṭangin 6.49% a tling.

September 10, Zir­tawpni leh September 11 khan Covid-19 positive mi 1,814 hmuh chhuah a ni a, Inrinni leh nimin khan hripui vei dam tawh mi 1,372 chhuahtir an nih laiin mi pali an thi. September thla ni 11 chhungin hripui vei mi 10,840 hmuh chhuah a ni tawh a, chawhrualin ni tin mi 985.45 hmuh chhuah an awm ang a ni.

IDSP record angin, Mizoramah Covid-19 vei 70,840 hmuh chhuah a ni tawh a, mipa 35,772 leh hmeichhia 35,068 an ni. Nimin tlai dar 5 thleng khan mi 58,543 (82.64%) chhuahtir an ni tawh a, mi 237 (0.33%) thi tawhin, enkawl mek mi 12,060 (17.03%) an awm.

September 10, 2021-a Covid-19 vei hmuh chhuah mi 725-te chu mipa 353 leh hmeichhia 372 an ni a; ZMC labo­ratory-a hmuh 41, TrueNAT-PCR hmanga hmuh 60, RAT hmanga hmuh 619 leh Fluorescent Immunoassay (FIA) hmanga hmuh panga an ni.

Ni 2 chhungin hripui vei 1,814 hmuh a ni
Mi 725-te chu symptom nei 432 leh nei lo 293 an ni a, tualchhunga kái 724 leh state páwn aṭanga tun hnaia rawn lut pakhat niin, tualchhunga kái zingah kàina chin hriat loh 388 an awm. Kum khat tling lo an awm nual a, thla khat mi pahnih awmin, kum 90 tling tawh pathum an awm a, a upa ber chu kum 94 a ni. September 11-a hripui vei hmuh thar mi 1,089-te chu mipa 518 leh hmeichhia 571 an ni a; ZMC laboratory-a hmuh chhuah 288, TrueNAT hmanga hmuh 73, RAT hmanga hmuh 700 leh FIA hmanga hmuh 28 an ni.

Mi 1,089-te chu symptom nei 486 leh nei lo 603 an ni a; tualchhunga kái 1,086 leh state pawn aṭanga lut pathum niin, tualchhunga kái zingah kàina chin hriat loh 459 an awm. A naupang ber chu thla 2 mi a ni a, a upa ber chu kum 92 a ni thung. September 10-a sample endik dan chu - ZMC-ah 640, TrueNAT hmangin district 10-ah 394, RAT hmangin district 10-ah 5,620 leh FIA hmangin 100 a ni a; a vaiin sample 6,754 a ni. Sample endik aṭanga hripui vei hmuh chhuah 725 chu 10.73% a ni a; ZMC-ah 6.41%, TrueNAT-ah 15.23%, RAT-ah 11.01% leh FIA-ah 5% a ni.

District tinah Covid-19 vei hmuh chhuah dan chu - Aizawl district-ah mi 438, Lungleiah 72, Lawngtlaiah 48, Siahaah 44, Mamitah 37, Champhaiah 31, Serchhipah 27, Hnahthialah 16, Khawzawlah 10 leh Saitualah pahnih a ni a; Kolasib district-ah hmuh a ni lo. September 11-a sample endik dan chu - ZMC-ah 2,378, TrueNAT hmangin district 10-ah 542, RAT hmangin district 10-ah 4,728 leh FIA hmangin 143 a ni a; a vaiin sample 7,791 a ni. Sample endik aṭanga hripui vei hmuh chhuah 725 chu 13.98% a ni a; ZMC-ah 12.11%, TrueNAT-ah 13.47%, RAT-ah 14.80% leh FIA-ah 19.60% a ni.

September 11 hian district tinah hripui vei hmuh a ni a; Aizawl district-ah mi 635, Kolasib-ah 104, Siahaah 78, Lungleiah 72, Serchhipah 63, Champhaiah 54, Lawngtlaiah 51, Mamitah 16, Khawzawlah 11, Saitualah pali leh Hnahthial district-ah pakhat hmuh a ni. Mizorama Covid-19 vei hmuh tawh 70,840 chu kum 2011 chhiarpui angin, mi 1,000 zelah hripui vei mi 64 an awm ang a ni.

Nimin khan tlai dar 5 thlengin hripui vei dam tawh mi 368 chhuahtir an ni a; Aizawl district-ah mi 177, Lawngtlai district-ah 63, Kolasib leh Mamit district-ah 39 ve ve, Lunglei district-ah 20, Champhai district-ah 16, Serchhip district-ah 10 leh Hnahthial district-ah mi pali an chhuak. Inrinni khan mi 1,004 chhuahtir an lo ni tawh bawk.