Mizoram hnenah PDRD grant Cheng vbc. 149.17 pek a ni

Sorkar laipuia Ministry of Finance hnuaia Department of Expenditure chuan September 9, 2021 khan sorkar kum kal mek 2021-22 chhunga a vawi hnihna atan state 17 hnenah Post Devolution Revenue Deficit (PDRD) grant cheng vbc. 9,871 a pe chhuak a; Mizoram hnenah cheng vbc. 149.17 pek a ni.

PIB-in Ministry of Finance thuchhuak an tarlan danin, Post Devolution Revenue Deficit grant hi Constitution Article 275 hnuaiah state 17-te hnenah pek a ni a, 15th Finance Commission ruahmanna anga pek ṭhin a ni. September 9, 2021-a pek chhuah nen hian sorkar kum kal mekah state 17 hnenah cheng vbc 59,226 pek chhuah a ni tawh.

15th Finance Commission chuan financial year 2021-22 chhungin state 17 hnenah Post Devolution Revenue Deficit Grant cheng vbc. 1,18,452 pek turin a ruahman a; tun thlenga pek chhuah tawh vbc. 59,226 chu pek tur zat aṭangin a zatve (50%) a ni.

Post Devolution Revenue Deficit grant pek chhuah thar hi a dawngtu state 17 zingah Mizoram chu chang tlem zingah pangana a ni a, Mizoram aia chang tlem state pali - Haryana, Sikkim, Meghalaya leh Karnataka-te an awm.

Kum 2021-22 atana Post Devolution Revenue Deficit grant hi Mizoram chuan thla khat atan cheng vbc. 149 vel deuh zelin a dawng a, September 9, 2021-a Ministry of Finance-in a pek nen hian 2021-22 chhungin cheng vbc. 895 a dawng tawh a ni.