Periodic patta siam tumin dan a kalh lo Mipui hmakhaw ngaih vanga ti kan ni - Revenue Minister

Land Revenue & Settlement (LRS) minister Lalruatkima chuan, Vairengte leh Sairang inkar kawng (NH 06 leh 306) siamṭhat a nih dawn avanga ram lâk tur VC pass-te periodic patta-a let tura hmalaknaah dan kalha thil tih a awm lo niin a sawi a, "Mipui hmakhaw ngaih vanga ti kan ni," a ti.

Lalruatkima hian nimin khan a pisaah thuthar thehdarhtute a kâwm a; ZPM leader Lalduhoma, MLA-in thuthar thehdarhtute hmaa Vairengte leh Sairang inkar kawng siam tura dan loa zangnadawmna lak tumna a awm thu a sawi chungchang a sawifiah.

NHIDCL aṭangin April 25, 2020-ah NH 06 leh 306 siamṭhat a nih tur thu LRD department-in a dawng tih sawiin Lalruat­kima chuan, "Email-a dawn a ni a, road align­ment chu KMZ/KML & AutoCAD file ho download theih a ni lo. An file-ah geo-coordinates tarlan a ni lo," a ti.

LRS Minister sawi danin, road alignment an thlak tih hre loin, kawng chu rehabilitate leh upgrade tur anga lehkha an dawn subject-ah tarlan a nih loh avangin May 27, 2020-ah NH 06 leh NH 306 atan freezing order tihchhuah a ni a, allotment thar pek leh pass extension (zauh) khap a ni.

Ministry of Road Transports & Highways (MoRTH) chuan ram lak tur chungchanga hma la turin competent authority for land acquisition (CALA) atan Kolasib Additional DC ruat a nih thu August 31, 2020 khan The Gazette of India-ah a chhuah.

Lalruatkima chuan, NHIDCL-in January 20, 2021 khan LRS department-ah lehkha an thawn tih sawiin, "Freezing order chhuah hmasakah geo-coordinates a awm loh avangin geo-coordinate anga freeze ṭha turin min rawn ngen," a ti a; ngennaah freezing order notification 27.5.2020-a chhuah tawh hnu lama ram pekte chu zangnadawmna an pek theih dawn loh thu an tarlang tel tih a sawi.

NHIDCL ngen angin April 7, 2021-ah road alignment thar tur atan freezing order chhuah ṭhat a nih thu sawiin LRS Minister chuan, "Order-ah hian ni 27.5.2020 hma lama ram dilna dawn tawh chu dan anga process tur tih a nih bakah, provision thar siam a ni," a ti.

LRS Minister sawi danin, freezing order tharah chuan, 'Ram enkawl ṭha, eizawnna leh chhungkaw châwmna atana ram lo hmang, Revenue danin valid pass nei lo anga a sawi leh ngaih an awm a nih chuan an ram awmna VC President leh Settlement Office-te'n an hriatpui chuan valid pass ngaihtuah theih a ni ang. Mahse, documentary proof-te a dik lo a nih chuan a certified/issue-tu chungah The Mizoram Land Revenue Act leh hemi chungchang dan hman lai angin hrem a ni ang,' tih telh a ni.

Lalruatkima chuan notification chhuah a nih dawnin Revenue Minister a nih angin Assembly budget session laiin recess room-ah MLA pali - Zodintluanga Ralte, C Lalsawivunga, VL Zaithanzama leh Dr Vanlalthlana te a sawipui thu sawiin, "Rawtna emaw, thurawn emaw min pek tur an hre bik lo," a ti.

NH 06 leh 306 siamin a huam tur chhung VC pass-te valid pass a ṭul anga siam tura nawrtu zingah Tuirial bialtu MLA thi ta Andrew H Thangliana pawh a tel thu sawiin Lalruatkima chuan, "Keimah ngei pawh min sawipui a ni," a ti a; Kawnpui-I VC, Bilkhaw­thlir VC leh Thingdawl VC (ZPM)-te pawhin a hnenah leh Kolasib-a Settlement Officer hnenah lehkha an thehlut niin a sawi.

Revenue Minister chuan, NH Act hnuaiah notification chhuah a nih tawh avangin zangnadawmna la tura inngai valid pass nei lote'n ram hlutna man an dawn ve theih dawn loh thu a sawi a, "Hei hi valid pass nei lote manganna a ni. The Mizoram (Land Revenue) Act, 2013 chu amend niin, section 17 (A) belh a ni a, ni 21.4.2020 khan notification chhuah a ni," a ti.

Mizoramah mi eng emaw zatin valid pass nei lo mah se, ram enkawl ve reng an tam tih sawiin Lalruatkima chuan, "Hetianga phalna nei loa ram enkawl hi a enkawltu tan a him loh bakah, sorkar pawhin chhiah a lak theih loh avangin eng emaw zat kan chán a ni," a ti a; MLR Act-a Section 17(A) belh chu valid pass nei lo ram enkawltute pass siamsak theihna a nih thu a sawi.

Lalruatkima sawi danin, MLR Section 17(A) angin Mizoram pum (district council tel loin) tuam chhuah vek tum a ni a, thawktu indaih loh vangin a ruala tih vek theih a ni lo a, Kolasib district-ah bul ṭan a ni. Vairengte-Sairang kawng siam tur nen inzawmna a nei lo. Kolasib district-ah zawh a nih veleh district dangah chhunzawm a ni ang.

Zangnadawmna pek duh avangin Kolasib dist.-ah hma an la lo nia sawiin Minister chuan, "Zangnadawmna pek duh vanga kalpui chu ni ila, NH-54 zauh (Aizawl-Tuipang) leh NH 102 B, NH 06 (Aizawl-Champhai)-ah pawh kalpui awm tak a ni," a ti. Lalruatkima chuan, MLR Act Section 17(A) hnuaia hmalakna leh kawng siam tura hmalakna a innan thu sawiin, "Sorkarin remchangah hmangin, kawng siamna tura ram tihchhiat tur neitute kutbénga an awm duh loh avangin an thlahtute aṭanga eizawnna atana an hman tawh leh hman mek hian hlutna nei se tiin dan hnuaiah kawng kan zawnpui a ni," a ti a, mipui hmakhaw ngaia hmalakna niin a sawi.

Lalduhoma'n dan loa pass pek tum mi 71 an awm anga a sawi chu tun thlengin sorkarin a la hre lo nia sawiin Minister chuan, "A awm a nih chuan chung mite dilna chu uluk takin kan endik ang a, a ṭul chuan cancel thlengin hma kan la ang. Officer transfer pawh kan siam ni loin, DPAR siam a nih avangin kan hriatpui lo," a ti.
LRS Minister chuan, sorkar siamtu chu mipui an nih angin mipui tan theihtawp chhuah chu sorkar mawhphurhna a ni tih sawiin, "Kan hmalakna hi a hlawhtling ngei ang tih a sawi theih loh a, a hlawhtlin hlauh chuan chhungkaw tam tak sum lak luh a pung ang a, sorkar revenue pawh a pung dawn a ni," a ti a, mangang leh ṭanpui ngaite tan sorkar a din tlat dawn thu a sawi.

Zawhna chhangin Lalruatkima chuan, Vairengte-Sairang inkar siam dawn avanga ram lak turah ram a neih loh thu a sawi a, "Ram ka neih loh avangin zangnadawmna ka dawng dawn lo. Zangnadawmna an dawn aṭanga min pek ve tum an awm pawh ka hre lo," a ti.