Ni thum chhungin ráltlân 1,236 vel an rawn lut

Myanmar ram Chin state chhungah sorkar sipaite leh mipui sipai (CDF/CNF)-te nasa zawka an inbeih avangin September 10, 2021 aṭanga nimin thleng khan Mizoramah ráltlân mi 1,236 an rawn lut tawh.

Ráltlân tun hnaia rawn lut ni lo, a hma lama rawn lut tawh zinga naupangte chu Mizorama an awmna khuaah sikul an kai mek.

Hnahthial District
Hnahthial district chhungah Myanmar ráltlân 1,541 vel an lut tawh a, nimin khan mi eng emaw zat an luh belh leh a, a zat erawh he thu ziah lai hian hriat theih a la ni lo.

Thu dawn danin, Hnahthial district-ah hian kumin June 30 thleng khan ráltlân mi 633 an lut tawh a, September 10 aṭangin Pathianni zan thleng khan mi 908 luh belh tawhin, a hmaa mite nen an vaiin mi 1,541 vel an tling tawh.

February 1, 2021 aṭanga Myanmar-a tualchhung buaina a thlen hnua September 12 zan thleng khan Hnahthial district-a khua zingah Thingsaiin raltlan ngah berin, mi 723 an nei tawh a; New Ngharchhipin dawtin, mi 284 an lut tawh a ni.

Thingsaia ráltlânte
Thingsai khuaa Raltlan Relief & Management Committee-in nimin zinga an tarlan danin, September 10-a Myanmar ram chhung Lunglera sipai camp beih a nih hmain ráltlân 313 an nei a, chungte chu mipa 140 leh hmeichhia 173 an ni a, puitling 172 leh naupang 141 an ni.

September 10-a Lungler leh a chhehvela Myanmar sipai leh mipui sipai (CDF/CNF)-te inbeih aṭangin September 12 thleng khan Thingsaiah mi 400 chuang an lut tawh. September 10-ah mi 20, September 11-ah mi 135 vel leh Pathianniah mi 255 an lut a ni. Luh belh tur eng emaw zat an la awm bawk.

Lungler sipai camp beih hma leh beih hnua Thingsai rama ráltlan lut tawh zawng zawng chu mi 723 vel an ni a, an zingah kum 90 tling tawh te, nausente leh naupang ṭhahnem tak an tel.

Ráltlân hmasate chu Halkha, Thantlang, Saikah, Tlangte, Bungtlang, Lungler leh Leisen aṭanga kalte an ni hlawm a, September 10 aṭanga raltlante erawh chu Leisen, Lungler leh Bungkhua mite an ni tlangpui.

Thingsai Raltlan Relief & Management Committee (RRMC) chuan, râltlante chu sorkar inah ni sarih an khung hran thu leh ni sarih hnuah Thingsai PHC-ah RAT hmangin swab sample endik vek a nih thu an tarlang a; "Khawtlangin Thingsai hmar lama raltlan camp-ah in 10 kan sa tawh a, sak belh leh tum a ni. Ṭiau kama Border Haat bazar shed building pathum awm sa, raltlan camp no. 2 atana kan hman mek kiangah bûk dang sak belh tura ruahman mek a ni bawk," an ti.

Thingsai khuaa raltlan hmasate zinga naupang, sikul kai rualte chu sikul kaitir an ni a, an vaiin mi 54 an ni. Primary School IV-ah zirlai 26, P/S V leh Thingsai M/S-ah zirlai 10 ve ve, Savidge English School-ah zirlai panga, BT English School-ah zirlai pahnih leh Saikuti M/S-ah zirlai pakhat an awm.

Thingsai RRMC hian râltlante puala chhawmdawlna pe duh tan ruahmanna an siam a; RRMC treasurer B Lalliannguri bank account no. 11848150393 (IFSC SBIN0005827, SBI Hnahthial Branch) leh Gpay-in no. 9436147343-ah pek theih a ni.

Tuipuiral, Champhai district
Tuipuiral Group YMA secretary B Challian­ngura'n Vanglaini palai a hrilh danin, Tuipuirâl huam chhungah Myanmar aṭanga ráltlân 1,800 chuang an awm mek a, chu'ng zinga mi 1,501 chu tun hnai têa rawn lut ni lo, a hmaa rawn lut tawhte an ni a, tun hnaia rawn lut nimin chawhma lam thleng khan mi 328 an awm tawh.

B Challianngura sawi danin, niminah pawh Mizorama lut tur mi 100 vel chu Saikhumphai bul Ṭiau lui kamah an thleng a, chungte chu khuaa an luh hunah chuan ráltlân zat a pung leh dawn a, Vaphai khuain an buaipui a ni.

Sikul hawn a nih tawh avangin a hmaa Myanmar aṭanga raltlan rawn lutte dah hranna (quarantine centre) atana an hman sikulte chu hman a remchang tawh lo tih sawiin Challianngura chuan, "Kan buai phah hle. An awmna tur hi chu tih dan a awm thei zel a, Myanmar hi hri lênna a nih avangin rawn lutte hi khung hran phawt an ngai a, sikulte kan hman theih tawh loh avangin quarantine an ngai si hian a tibuaithlak hle," a ti.

B Challianngura chuan, Farkawn leh Vaphai khuate'n quarantine centre an neih sate chu a khah vek thu sawiin, "Tunah hian sak belh leh an tum mek," a ti a; Khuangthing, Vanzau, Thekte, Thekpuiahte pawh quarantine centre tur sak an tum thu a sawi.

Myanmar ráltlân, a hmaa rawn lut tawhte zinga naupangte chu sikul kaitir an ni tih sawiin Challianngura chuan, "A tam zawk chu sorkar sikulah an lut a, private English medium sikula lutte an awm ve bawk," a ti.

Tuipuiral Group YMA Secretary sawi danin, an huam chhunga ráltlân naupang, sikula lut zat chu mi 200 chuang an ni a, zirlai tamna ber Farkawnah 114 awmin, Zawlseiin (zirlai 42) an dawt a, Khawbung leh Vaphaiah zirlai 29 ve ve an awm bawk. Ráltlân awmna khaw ṭhenkhatah erawh chuan sikul kái rual an awm lo.