Periodic patta buaipuitute'n zangnadawmnaah 75% ei an tum hi kan duh lo - Lalduhoma

ZPM leader Lalduhoma, MLA chuan, Vairengte-Sairang kawng siam tura ram lak tur zinga VC pass chauh neite periodic patta-a lehsak tura hma latute'n zangnadawmnaah 75% chan ve an tum tih a sawi.

Lalduhoma hian nimin khan an party pisaah thu sawiin, "Vairengte leh Kawnpui inkar four lane-in a tan tlang tura compensate latu tur ram neitu hming zawng zawng hi an hming leh an pass number nen National Highway Act Section 3A hnuaiah dah luh diam niin, tihfel vek a ni tawh. Tihfel vek tawh hnuah NH Act Section 3A hnuaia VC pass an tih ho kha tunah hian periodic patta siam tumin beih mek a ni," a ti.

VC pass thehluh tawhte chu periodic patta-a siam theih a la nih chuan a duhsak a, a lawmpui thu sawiin Duhoma chuan, "Tualchhung mite leh a ram neitute ngei an nih phei chuan kan duhsak tak zet," a ti a, sorkarin a ti thei a nih chuan thil lawmawm a nih thu a sawi.

Lalduhoma chuan a duh loh sawiin, "VC pass-te periodic patta-a siamsak tura buaipuitute'n zangnadawmna dawn tur aṭanga 75% ei ve tuma affidavit sign tir an tum hi a ni. Ram neitute'n an zangna­dawmna dawn tur chu a vaiin nei rawh se. Tute emaw an pe phal ve a nih chuan an thu a ni a, intiamkamna affidavit meuh ziak a, 'Ka dawn tur aṭanga 75% hi ka theh chhuak ve ang' tihtir tum hi ka dem a ni," a ti.

ZPM Leader chuan, Chief Minister-in Khamrang leh Sairang inkar kawng alignment thar a rawt avangin zangnadawmna latu turte tihfel theih a la ni lo tih sawiin, "A thawktu tur NHIDCL hian Khamrang leh Sairang inkar hi alignment an tifel vek tawh a, hemi atan hian sum tam tak an séng," a ti a, a thar siam leh dawn chuan vaibelchhe tél an sen belh a ngaih tur thu a sawi.