Tourism minister conference-ah tel

Union Tourism minister G Kishan Reddy kaihhruaiin nimin khan Guwahati-ah North East Tourism Ministers Conference ṭan a ni a, Mizoram Tourism minister Robert Romawia Royte a tel. Conference hi vawiinah chhunzawma zawh a ni ang.

Robert Romawia Royte chuan, State Institute of Hotel Management a taka a kal vat theih nan hma la chak turin Union Minister a ngen a; G Kishan Reddy chuan, Mizoram tan Pilgrimage Rejuvenation and Spiritual Augmentation Drive sanction a nih tawh thu leh sanction order pawh Mizoramin a hmuh thuai tur thu a sawi.

Sorkar thuchhuah tarlan danin, Robert Romawia hian conference-ah hian 10% Gross Budgetary Support chungchang te, PIDDC scheme tawp vanga hna thawh chhunzawm theih loh chhunzawm chungchang te, skill development chungchang, Swadesh Darshan Scheme hnuaia ropeway project rei tak ṭhuanawp tawh te, NESIDS guidelines siamṭhat a ngaih thu te, hmarchhak state-te chu state dangte nen bûk lung khata khaikhin lo tur leh a bika ngaihhnathiam a ṭul thute a sawi.

Conference-ah hian Union minister of state for Tourism & Defence Ajay Bhatt, minister of state for Culture & Parliamentary Affairs Arjun Ram Meghwal leh Assam chief minister Himanta Biswa Sarma bakah, hmarchhak state pariata tourism minister-te an tel a; Robert Romawia hi Tourism director V Lalengmawia leh official dangte'n an ṭawiawm a ni.