COVID-19: Mizoram dinhmun ; Hripui vei 541 hmuh belh a ni

September 12, Pathian­­ni khan Mizo­ramah Covid-19 vei mi 541 hmuh chhuah a ni a, September thla ni 12 chhungin mi 11,381 hmuh chhuah a ni tawh.

Nimin khan hripui vei dam tawh mi 313 chhuahtir an ni a, hripui vei mi pali an thi.

Covid-19 vei Pathian­nia hmuh tharte chu mipa 258 leh hmeichhia 283 an ni a; TrueNAT-PCR hmanga hmuh chhuah 11, RAT hmanga hmuh 518 leh Fluorescent Immunoassay (FIA) hmanga hmuh 12 an ni. ZMC laboratory-ah swab sample endik a ni lo.

Mi 541-te chu symptom nei 379 leh nei lo 162 an ni a; tualchhunga kái vek niin, kàina chin hriat loh 292 an awm. IDSP record angin, Mizoramah Covid-19 vei 71,381 hmuh chhuah a ni tawh a, mipa 36,030 leh hmei­chhia 35,351 an ni. Nimin tlai dar 5 thleng khan mi 59,060 (82.74%) chhuah­tir an ni tawh a, mi 241 (0.34%) thi tawhin, enkawl mek mi 12,080 (16.92%) an awm.

September 12, Pathiannia swab sample endik dan chu - TrueNAT hmangin Mamit leh Khawzawl district-ah 141, RAT hmangin district pariatah 1,591 leh FIA hmangin Aizawlah 12 a ni a; a vaiin sample 1,744 a ni. Sample endik aṭanga hripui vei hmuh chhuah 541 chu 31.028% a ni a; TrueNAT-ah 7.80%, RAT-ah 32.56% leh FIA-ah 100% a ni. Siaha, Champhai leh Saitual district-ahte sample endik a ni lo.

Pathiannia district tina hripui vei hmuh chhuah zat chu - Aizawl district-ah mi 408, Mamitah 69, Lungleiah 23, Lawngtlaiah 17, Serchhipah 12, Khawzawlah pariat, Kolasib-ah pathum leh Hnahthialah pakhat a ni a; Aizawla veng 64 leh khaw dang 28-a mite an ni.

Covid-19 vei hmuh thar 541 zingah naupang kum tling lo 170 chuang an awm a, an zinga mi 100 chuangin symptom an nei. Nausen kum khat tling lo pakua telin, an zinga panga chu symptom nei an ni. Kum 60 chung lam mi 50 vel an tel a, an zinga 30 velin symptom an nei.

September thla ni 12 chhungin hripui vei mi 11,381 hmuh a ni tawh a, chawhrualin ni tin mi 948.42 hmuh chhuah an awm ang a ni. Mizorama Covid-19 vei hmuh tawh 71,381 chu kum 2011 chhiarpui angin, mi 1,000 zelah hripui vei mi 65 an awm ang a ni.

Nimin khan tlai dar 5 thlengin hripui vei dam tawh mi 313 chhuahtir an ni a; Aizawl district-ah mi 132, Kolasib district-ah 69, Mamit district-ah 42, Lawngtlai district-ah 38, Champhai district-ah 19, Lunglei district-ah 10 leh Saitual district-ah mi pathum an chhuak.

Mizorama Covid-19 vei hmasa ber chu March 24, 2020 khan Guwahati Medical College-ah hmuh chhuah a ni a; ZMC-ah positive 15,384 hmuh chhuah a ni tawh a, TrueNAT-PCR hmangin 4,054, RAT hmangin 51,710, FIA hmangin 232 leh Guwahati-ah pakhat hmuh chhuah a ni tawh.

IDSP tarlan danin, September 12, 2021 thlengin Mizoramah swab sample 9,65,385 endik a ni tawh a, chu'ng aṭanga Covid-19 vei hmuh tawh zat 71,381 chu 7.39% a ni. Hripui vei hmuh tawh zinga mi 66,984 chu Mizoram chhunga kái chhâwng an ni a, mi 4,397 chu Mizoram páwn aṭanga an rawn luh hnua hmuh chhuah an ni.