ZPM-in an pawl zawm thar lawm lut

ZPM party chuan nimin khan an pisaah an party zawm tharte lawm luhna inkhawm an buatsaih a, ZPM working president K Sapdanga'n kaihruaiin, leader Lalduhoma, MLA-in a lawm lut.

Lalduhoma chuan, Mizoram chu kum 35 chhung state a nih hnuah party pahnihin an kaihruai tawh tih sawiin, "Party pahnihin kan ram an kaihhruai dana lungawi tâwk lote leh a aia ṭha beiseitu zawng zawng chu ZPM-ah kan lo welcome vek a ni. Kalphung thara kal kan ni a, party-a rinawmte hi kan inzirtir ve bawk nãin, chu ai maha kan ngaih pawimawh chu policy-a rinawm a ni," a ti.

Ram hluiah chuan party-a rinawm an inzirtir tih sawiin Lalduhoma chuan, "Policy-a rinawm an inzirtir miau loh avang leh party-a rinawm an inzirtir tlat avangin an pute an kal sual hnuah pawhin an zui tlat ṭhin. Hei hi kan ram natna benvawn a ni," a ti a; hruaitu chu a kal sual tawh chuan zui zel miin an bat tawh loh thu a sawi.

ZPM thuchhuah tarlan danin, an party-ah PC party aṭangin treasurer hlui SL Ngursailova leh hruaitu hlui dang pathum, MPCC media secretary hlui David M Thangliana leh mi dang pasarih an lawm lut a ni.