Covid-19 vangin mi pali an thih belh

Nimin khan Mizoramah Covid-19 vei mi pali an thi. Sorkar chhinchhiah angin, nimin tlai dar 5 thleng khan Covid-19 vangin Mizoramah mi 241 an thi tawh a, September thla bikah mi 24 an thi tawh.

Covid-19 vei enkawl lai C Lallianmawia (78), Ṭhuampui, Aizawl chu nimin zing dar 5 khan State Referral Hospital (ZMC)-ah a thi. Hripui vei a ni tih August 25, 2021-ah hmuh chhuah a ni a, September 3-ah SRH-ZMC-ah dah luh a ni.

Nimin chawhma dar 10:50 khan Thangkimi (79) m/o B Lalthansanga, Bethlehem Vengthlang chu a thi a, Covid-19 vanga thi-ah sorkarin a chhiar. Covid-19 vei a ni tih August 4, 2021-ah hmuh chhuah a ni a, SRH-ah enkawl nghal a ni. Bethlehem Vengthlang aṭanga thu dawn danin, Thangkimi hi lung ṭha lo nei a ni a, SRH-a a awm laiin ni nga vel kal taa a sample endiknaah Covid-19 lakah a fihlim (negative) tawh a, mahse, Covid-19 veiah chhiar a ni.

H Tintlunga (67), Lawngtlai Chandmary pawh nimin chhun dar 12:15 khan Lairam Christian Medical Centre & Hospital, Lawngtlaiah a thi. Thu dawn danin, H Tintluanga hi natna khirh tak vei a nih avangin LCMCH, Lawngtlaiah enkawl a ni a, damdawi-inah hian Covid-19 positive a ni tih finfiah a ni.

Nimin vêk tlai dar 3:15 khan H Vanlalhluna (57) h/o Vanlalruatpuii, Zokhawthar chu Covid-19 vangin SRH-ZMC-ah a thi a, hripui vanga Mizorama thi 241-na a ni. Amah hi thisen sang nei a ni a, Covid-19 vei a ni tih August 25 khan hmuh chhuah a ni a, August 27 aṭangin SRH-ah enkawl ṭan a nih thu sorkar thuchhuakin a tarlang.