Ráltlân chhawmdawlna tur ruahman

Hnahthial bawrhsap H Dolianbuaia leh sorkar official dangte leh pawl hrang hrang hruaitute chuan nimin khan DC Conference Hall-ah an district chhunga Myanmar ráltlânte chungchang an sawiho a, chhawmdawlna tur an ruahman.

H Dolianbuaia chuan, Myanmar raltlante chhawmdawlna turin sorkar laipui aṭangin ruahmanna a awm lo tih sawiin, "Hemi chungchangah hian Mizoram sorkarin sorkar laipui a nawr reng a, kan unaute an nih avangin kan hlamchhiah thei si lo a, a theih dan dana chawmdawl hi kan tih tur a ni. Rîkrum thil a nih avangin Disaster Management Act hnuaiah hmalak theih a nih tho avangin a ṭul a nih chuan order pawh siam theih a ni," a ti.

Hnahthial DC chuan, raltlante mamawh hmasa atan tui dah khawlna tur (Brite bucket) leh silpauline awm ang ang an pe chhuak nghal dawn tih a sawi a; tui dah khâwlna tur tuizem an ngaihtuah zel tur thu a sawi bawk.

Hnahthial medical officer Dr Lalrengpuii Ralte chuan, damdawi lama raltlante mamawh tur lam turin nimin khan Aizawlah aiawh an kal thu a sawi a, "Naktuk (Thawhlehni)-ah medical team pahnih/thumte'n raltlan awmna hmun kan tlawh ang a, RAT bakah an hriselna dinhmun kan enfiah ang," a ti.

Sorkar aṭanga ráltlânte buaipui tur nodal officer atan SDO (Sadar) Lalremruata Sailo leh Assistant NO atan Jennifer Vanlalhruaii Pachuau, SDC-te ruat an ni. Meeting-ah hian Police, PHE, PE, PWD, Health, FCSCA, MJA, ráltlân luhna khawtlang hruaitute leh Hnahthiala VC-te an tel.