CMRF sum party induhsakna atana hmangah MNF party puh

Lunglei District Congress Committee (LDCC) chuan thuchhuah siamin, Lunglei East biala veng ṭhenkhatah MNF party-ten tlawmngai pawlte ráwn loin Chief Minister's Relief Fund for Covid-19 aṭanga chhawmdawlna sum an hmuhte an sem a, an party mi leh sa duhsak nan an hmang tih an tarlang.

LDCC chuan, Congress party-a general secretary Joseph Lalhimpuia hoa Lunglei East biala veng ṭhenkhat nimin zinga an tlawhnaah, veng ṭhenkhatah MNF party-te'n CMRF for Covid-19 sum an sem tih an hriat thu an tarlang a, "Ruling sorkar tha chakna an neih hmachhuanin NGO-te ráwn loin an party mi leh sa duhsak nan hmangin an sem mai mai tih hmuh chhuah a ni," an ti.

LDCC chuan, "Mi tlawmngai leh thil phal, kohhran leh NGO, ṭhian ho leh mimalte'n Pathian malsawmna an dawn aṭanga mi harsa zawkte ṭanpui nana sum an thawh khawmte MNF party-te'n an party induhsak nan a an lo chalâi kual vel hi tenawm kan ti a, MNF thil tih dan hi zahthlak kan ti," an ti a; sum thawhtute hmai êng tal zah tur leh tun hnuah CMRF chu inthliar nan lo hmang tawh lo turin MNF party an chah a ni.