Refugee camp-ah Bru voter 10,052 an awm ; Bru hruaikirna atan vbc. 924.2 hmuh a ni
March 29 Assembly Session-ah Home minister R Lalzirliana chuan MNF member Lalruatkima zawhna ziaka chhangin, Tripura refugee camp-ah Mizorama lokir tur Bru vote nei 10,052 an awm thu tarlangin, "Mizorama an rawn kirna turin sorkar laipui aṭangin cheng nuai 924.2 hmuh a ni tawh," a ti.
Home Minister tarlan danin, Bru Mizoram mi leh sa dik tak Mizorama lak kirna atan sorkar laipui aṭangin road map-I atan cheng nuai 243.80, road map-II atan cheng nuai 243, road map-III atan cheng vbc, 17.84 leh road map-IV atan cheng vbc. 25.9 hmuh a ni. Road map I,II leh III sum hi hman a ni tawh a, road map-IV sum cheng vbc. 9.7 chu inpuahchahna atan hman a ni.
November, 2016-a Bru-te enfiahna aṭanga a lan dan chuan Mizorama hruaikir tur Bru chu chhungkaw 5,407 an ni a, electoral roll-a chuang zat chu 10,052 an ni.
Refugee chhungkuate refugee camp-a an awm dan chu - Kaskau-ah 577, Khakchangpara-ah 182, Hamsapara-ah 350, Asapara-ah 864, Naisingpara-ah 2916 leh Hazacherra-ah 518 a ni.
Bru rawn kir duhte chu Mamit district-ah khaw 48, Lunglei dstrict khaw pali leh Kolasib district-ah 10 ah dah tum an ni.
Rawn kir duhte chu Ministry of Home Affairs ruahman angin, chhungkaw tin housing & cash assistance-ah Rs. 1,30,000, cash assistance-ah kum hnih chhung thla tin Rs. 5000, ration a free-in kum hnih chhung, in chhung mamawh leina atan Rs. 3500 leh ram 30X40 a zau pek an ni ang.
Bru-te hian Mizorama kir turin thil eng emawzat an phut a, hemi chungchangah hian Home Minister chuan, "An thil phutte hi dan in a phal a, sorkarin ṭul a tih chuan tihhlawhtlin beisei a ni," a ti.
Bru-te thil phut :
. Chhung tin hnena thlai chinna tur ram acre 5 ṭheuh pek
. Bru let lehte khaw khata dah khawm
. An khaw awmnaah electric, tui, sikul, damdawi-in, ek-in, kawng ṭha etc. siam.
. Ram a thing leh thlai zalen taka lak/hman phal.
. Zangnadawmna sum Rs. 80,000 aṭanga Rs. 10,00,000 a tih pun.
. Bru lakletna tur motor an lungawina ang thlapa felfai taka ruahman.
. Chhungkua zawng zawng hnena ration card thar pek.
. Electoral roll revision neiha Bru raltlan zawng zawng thun luh leh roll revision kumtina neih.
. Rehabilitation scheme hi Bru lungawina thlapa tih fel a nih hma chu tihluihnaa Mizorama lakkir loh.
. Dampa Sanctuary a tira an awm chhuahsanna hmuna awm let leh.
. Bru zirlai naupangte hnenah an zirna an chhunzawm theihna tur transfer certifcate pek vek.
. India constitution article 244 (2) zulzuia Bru ho tan autonomous district council pek.
. Mizoram laklet tumna hi a hlawhtling lo a nih chuan Tripura-ah an ṭanpuina tur zawng zawng bakah chenna in, tui, electric, zirna, damdawi etc nen Tripura-a khawsak phal.
(Heng hi Bru-te'n Supreme Court-a writ petition an thehluha an thil phutte a ni)