Ei leh in a ṭhat loh avangin kan zirlai puiin nunna a chan phah - NIT zirlaite

NIT, Mizoram zirlaite chuan an ei tur leh tui dawn a thianghlim tawk loh avangin an zirlai pui Dev Sharma, Bihar-in nunna a chan nia sawiin, vawiin aṭangin he thil thleng chhui chiang tura Ministry of Human Resources Development (MHRD) phutna atan NIT office, Chaltlang kawtah chaw an nghei dawn.

NIT, Mizorama 1st year zirlai, Tanhrila NIT hostel-a awmte chuan an zirlaipui hi ei tur leh chaw thianghlim a dawn loh avangin a nunna a chan phah niin Vanglaini an hrilh a, "Thla hnih kal ta vel

aṭang khan kan complaint tawh a, awmzia a awm chuang lo. Sum tam tak an dawng a, an eiru ṭeuh a, kan chan chu a tlem hle. 1st year zirlai chanve vel chuan ei leh in tur thianghlim loh avangin harsatna kan tawk a ni," an ti.

Zirlai nunna chan ta hian a hriselna lamah harsatna a tawhna a rei tawh thu sawiin NIT zirlaite chuan, "Damdawi-in pawh vawi thum hruai a ni tawh. Chawlh a dil pawhin warden-in mid semester exam phawt turin an ti tlat a ni," an ti a, March 29 khan an khaw lam a pannaah Guwahati-a damdawi-inah nunna a chan tak thu an sawi.

NIT zirlaite hian nimin khan governor Lt. Gen. Nirbhay Sharma hmuh an tum a, a awm loh avangin Raj Bhavan gate bulah lungawi lohna thuziak kengin hun engemawchen an awm a ni.

Vawiin aṭang hian NIT zirlai zawng zawngte chuan an zirlaipui nunna chan chhan chhui chiang a, thil tisualtu a ṭul anga hrem a nih theihna atana MHRD phutna atan NIT office tualah chaw an nghei dawn a, an thil phut tihhlawhtlin a nih hma chuan chaw nghei an tum thu NIT zirlaite chuan Vanglaini an hrilh.