Pawl 3-te'n NLUP beih zui zel an tum

Zoram Peoples' Move­ment (ZPM), BJP leh PRISM aiawhte chuan Inrinni khan thuthar thehdarhtute an kâwm a; Mizoram sorkarin oppo­sition MLA-te thlauh­thlaa ruling MLA-te chauh NLUP dawngtu tur thlang tura tih an ni chu a theih ang anga an beih zui zel dawn thu an puang.

BJP president Prof. JV Hluna chuan, Congress kaihhruai sorkarin NLUP atana sum hmante chu sorkar sum a nih laiin, Mizoram mipui huapzo loa Congress party mite chauh dawntir an tum ni âwma ngaih theiha hma an la chuṭha lo an tih thu a sawi a, "Mizoram mipui tana hmalakna a nih chuan, mipui ta a nih ang ngeiin sorkar sum Congress party-in an party hamṭhatna atana an hman hi thiang loah kan ngai," a ti.

Prof. JV Hluna chuan, central sorkar state hrang hrang sorkarin sorkar policy a nih chuan ram/state mipui zawng zawng an huamtir mai ṭhin tih sawiin, "Ni 100 inhlawhna (MGNREGS)-ah pawh India ram khua leh tui zawng zawng min huap mai ṭhin," a ti a; chutiang chuan Mizoram sorkar pawh hma la tura an phût thu a sawi.

JV Hluna sawi danin, February 9, 2018-a NLUP Implementing Board (NIB) chairman JH Roṭhuama'n lehkha DO No. CHM/VC/-AB/CHMN-NIB- 15/2/621) a tichhuak a, chutah chuan Congress party MLA 34-te hnenah chauh ruahman lâwkna awm loin ni sarih chhunga a dawngtu tur thlang turin a hriattir a; chuta tana sorkar sum ruahman chu nuai 400 a ni.

NIB Chairman thil tih dan chu anmahni siam vêk NLUP Manual bawhchhiatna a nih thu sawiin JV Hluna chuan, "Hei hian Congress party dinhmun a pho lang chianga kan hriat bakah, an MLA-te an timualpho hleah kan ngai," a ti.

BJP President chuan, Mizorama inthliarna, hmasawnna tur sum khairual lo a awm ṭhin chuan ram hmasawnna aiin awlsam taka sum hmuh theih dan tur mipui a zirtir ṭhin tih sawiin, "Zoram mipuite thlan tui fara sum hmuh ai chuan, awlsam zawka sum lak luhna kan inzirtir hi ram hmelma niin kan hria," a ti a; Mizoram mipui chu páwl sawi loa ram tichhetute do turin a sáwm a ni.

Pawl pathum hruaitute chuan, NLUP atan sum sem chu Congress party ta ni loin, Mizoram sum, mipui ta a nih avangin Congress party-in an party hamṭhatna atana an hmang chu dan kalh a nih thu an sawi a; Synod Social Front-in a zirchiannaah, NLUP dawngtu zinga 88.7% chu Congress party mi an ni a, 10.3% chu neutral leh 1% chu party dang mi an nih thu an sawi bawk.