Mizoram sorkar leh HPC (D)-in Vawiinah inremna an ziak dawn

Mizoram sorkar leh Hmar Peoples' Covention (Demo­cratic) chuan vawiin tlai dar 4:30 hian State Guest House, Aizawlah inremna thuthlung an ziak dawn.

Inremnaah hian Mizoram sorkar aiawhin chief secretary Arvind Ray leh HPC (D) aiawhin an chairman H Zosang­bera ten hming an ziak dawn a, inbiaknaa Mizoram sorkar aiawhte hotu political adviser to CM Lalrinmawia Ralte, MLA leh H Zosangbera ten thu an sawi ang.

Vanglaini palai zawhna chhangin Home addl. secretary Lalbiakzama chuan, inremna ziah hnuah HPC (D) mi leh sate chu Manipur aṭangin Mizoramah hruai an nih dawn thu a sawi a, "An vaiin mi 100 vel an ni a, CTI Sesawngah awm tir phawt an ni ang," a ti.

Inremnaa tihhlawhtlin tur awmte chu a tahtawlin tihhlawhtlin zel a nih tur thu sawiin Lalbiakzama chuan, "Road map duan lawk vek a ni a, chumi ang chuan hmalak zel a ni ang," a ti a, inremna ṭha taka siam a nih thu a sawi.

Ruahman lawk ang chuan HPC (D) te hian April 12, 2018 hian CTI, Sesawngah an ralthuamte Mizoram sorkar hnenah an hlan dawn a ni.