Sum lapse a awm lo - Finance Minister

Finance minister Lalsawta chuan, March 31, Inrinnia kum 2017-18 financial year tawpah sorkar sum hman zawh loha liam (lapse) tur a awm lo tih a sawi.

Finance Minister chuan press mite zawhna a chhannaah, sorkar laipuiin Planning Commission a ṭhiah hnuah plan sum, a hmanna tura hman zawh loha liam a awm thei tawh lo tih sawiin, sum hman zawh loh awmte chu kum thar atan a tihnun leh theih tawh a, Planning Commission awm laia sorkar sum hman zawh hman loh vanga liam ang chu a awm dawn tawh lo tih a sawi a ni.

Sorkar bill chi hrang hrang, district hrang hranga lutte chu March 31 khan chinfel hman a nia thu dawn a ni. Aizawl North leh South Treasury-te chuan, sorkar kum liam turah sum lapse a awm loh an beisei thu an sawi a; department hrang hranga Drawing & Disbursing Officer-te aṭanga bill lutte chu an pass kim vek a, Inrinni chhunah chuan a hnukhawi tlemtê chauh pass hmabak an nei tih an sawi.

Treasury officer-te sawi danin, sorkar kum thar dawna tlaivar dáwn dáwna hna thawh ngai ṭhin ang chu kuminah chuan a awm lo a, kum dang aia an buai loh chhan chu, sorkar sum dinhmun a ṭhat vang nia sawi a ni.