KHAWTHLIR
Lei siam dawn
Mizoram PWD chuan vawiin aṭanga May 5, 2018 thleng khian Sairang Sihhmui leh Lengpui inkara Tlawng lei (bailey bridge) chu siamṭhat hna an thawk dawn a, lirthei tlan tlang theih a ni dawn lo. Hei vang hian Aizawl SP chuan, lei siam a nih chhung chuan lirthei tê chi (LMV)-te chu Sairang Balukai leh Buchali lei lamah an kal theih tur thu leh, lirthei lian (HMV)-te chu Buichali lei lamah chauh a kal tur a nih thu a tarlang.
Thisen pe
March 31, Inrinni khan ṬKP Paithar bialte chuan Lawngtlai District Hospital tan thisen unit 43 an pe a, a petute mipa 37 leh hmeichhia paruk an ni. PYD (NEI), North Mizoram District pawhin Aizawl Civil Hospital tan thisen unit 19 an pe a, a petute mipa 18 leh hmeichhia pakhat an ni.
Rs. 5,37,47,695 bá
Health minister Lal Thanzara chuan, tun dinhmunah RSBY empanelled hospital hnena sum bat zat chu Rs. 5,37,47,695 a nih thu a tarlang. Health Minister-in March 28, 2018-a Assembly session-a Lalrinawma zawhna ziaka a chhan danin, RSBY hnuaia sorkarin empanelled hospital-a sum a bat zat chu kum 2016-17 chhunga bill 1,569-a Rs. 75,97,220 leh kum 2017-18 chhunga bill 8,219-a Rs. 4,61,50,475 a ni.
Mizo GK tlangzarh
R Lalhmangaihsanga lehkhabu buatsaih, 'Mizo Genreral Knowledge' tih chu March 31, Inrinni khan Mizoram Youth Commission chairman Joseph Lalhimpuia'n Aizawl Press Club-ah a tlangzarh.
SBM awareness
UDPA department leh ṬKP, Electric Veng unit-te chuan Inrinni zing khan Swachh Bharat Mission (Urban) hnuaia hmalakna hrang hrang puanzarna leh faina lam inzirtirna hun Lawngtlai Areopagi-ah an buatsaih a; ṬKP Electric Veng member-te leh bazara dawr nei leh mipui veivakte an tel.
La man lo
Home minister R Lalzirliana chuan MNF member Lalruatkima zawhna ziaka chhangin, kum 2013-2017 chhungin rangkachak tawlhruk tum Mizoram Police-in an la man loh thu a tarlang.