NLUP ṭanpuina mi 1,33,189 pe tawh Cheng nuai 1,27,806.50 sem tawh a ni

Agriculture minister KS Thanga chuan, Congress party kaihhruai Mizoram sorkar flagship programme NLUP hnuaiah mi 1,33,189 hnenah ṭanpuina pek a ni tawh a, chuta tan chuan cheng nuai 1,27,806.50 sem a ni tawh tih a tarlang.

March 20, Thawhlehnia Assembly session-a MNF member Dr K Beichhua zawhna ziaka chhangin KS Thanga chuan, NLUP ṭanpuina hi sorkar department pakaw hnuaiah mi 1,33,189 hnenah cheng nuai 1,27,806.503 sem a nih tawh thu a tarlang a; NLUP leh NEDP kal kawptir (convergence) aṭangin mi 1,500 hnenah cheng nuai 1500 sem a nih thu tarlangin, NLUP-NEDP convergence nen NLUP atan mi 1,34,689 hnenah cheng nuai 1,29,306.503 pek a nih tawh thu a tarlang bawk.

Agriculture Minister tarlan danin, NLUP atan sum hmuh tawh dan chu - kum 2010-11 ah cheng vbc. 234.82, kum 2011-12 ah vbc. 234, kum 2012-13 ah vbc. 370, kum 2013-14 ah vbc. 270, kum 2014-15 ah vbc. 317.32, kum 2016-17 ah vbc. 15 (NLUP-NEDP convergence), kum 2017-18 ah vbc. 82 a ni.

Kum 2014-16 chhunga sum hman chu a hma kuma sorkar laipuiin a pe tawh sa, K-Depoosit aṭanga hmuh a ni a, state budget aṭanga pek a awm lo. Kum 2017-18 chhunga hmuh chu state sorkar aṭangin cheng vbc. 62 leh NLUP-NEDP convergence aṭangin vbc. 20 a ni.