Pathian thuin kan ram hi i tidam ang u - Lalduhoma

Zoram Peoples' Movement (ZPM) hruai­tu Lalduhoma, ZNP president ni bawk chuan, Mizoramah Pathian lal ber an duh thu sawiin, "Kan ramin natna chi hrang hrang a tawh mek­ah Pathian thuin kan ram hi i tidam leh ang u," a ti.

ZPM ṭhalaite'n Sairang picnic spot-a political training an buatsaihah thusawiin Lalduhoma chuan, "Eizawnna hrang hranga bul ṭanna nei lote chu bána kaih (hand holding) policy hmangin, mahni kea an din theih thlengin an bánah kan kài dawn. Mimal emaw ṭhian ho emaw intêl khawmin, sumdawng tur­in mamawhna an nei a nih chuan loan hmangin kan khai chhuak ang a, a ṭum khatna a ding zo lo pawh an bánah kan kai chhunzawm zel ang," a ti a; sorkar chu guarantor-ah a ṭang dawn thu a sawi.

Political training-ah hian ZPM general secretary K Sapdanga'n ZPM policy a sawifiah a; ZPM Steering Committee vice chairman Lalthansanga, ZPM ṭhalai president Lalmuanpuia Punte-te pawhin thu an sawi a ni.