PWD engineer-te'n Lunglei SP hrem an phût Minister, EE leh SE thlalak hâl a uchuak an ti

Mizoram PWD Engineers Welfare Association (MIPEWA) chuan thuchhuah siamin, Aizawl-Lunglei World Bank kawng siam a chhiat vanga a enkawltu PWD EE, SE leh Minister-te thlalak Lunglei Ṭhalai Pawl-in an hâl chu uchuak an tih thu an tarlang. Lunglei SP hrem an phût thu an tarlang bawk.

MIPEWA chuan, PWD-in Aizawl-Lunglei kawng a siamah hna ṭha lo lai a awm chu pawi an tih tak zet thu sawiin, "Hetianga ṭha lo lai a lo awm ṭhin hi a pawi ti ber leh hrehawm titu berte chu a thawktute hi kan ni," an ti a; hna thawk ṭha turin PWD-ah an infuih nasa hle ṭhin niin an sawi.

MIPEWA tarlan danin, Pukpui-a hot mixed plant enkawltu PWD chowkidar R Laldinliana chu March 26, 2018-ah police station-ah hruai a ni a, Lunglei SP-in, 'A ṭah hma chu vaw rawh u,' a tih angin nasa taka vuak leh nghaisak a ni. R Laldinliana chu amaha kal thei lo leh haw thei loin a awm a, a chhungte'n police station aṭangin an phur haw a, Christian Hospital, Serkawnah admit a ni. Lunglei SP leh a hote chet dan chu an dem thu an tarlang.

MIPEWA hian an emergency meeting-ah thurel an nei a; "Dan lo anga mi nghaisa tura a naute thu petu Lunglei SP Lalṭhafamkima Jongte chungah a phu tâwk ang hremna pek ni rawh se," an ti.

Print media leh social media lama thu/thlalak/video thehdarhte finfiah a nih hmaa sorkar hnathawkte chungah action lak ṭhin tih tawh loh an duh thu leh, lim, thlalak inhâlsak chu thleng tawh lo se an duh thu an tarlang bawk.