RT-PCR lab. din lawk loh vanga Court zah loa inpuhna pawm a ni
High Court thupekin Lungleiah RT-PCR laboratory bun tura a tihah hmalak a nih lawk loh avanga RT-PCR for Chhimbial-in Court thupek zah lo leh zâwm duh lo (contempt of court)-a mi pasarih an puhna chu Gauhati High Court (GHC), Aizawl Bench chuan nimin khan a pawm.
RT-PCR Lab. for Chhimbial-in Gauhati High Court-a contempt of court petition an thehluh chu nimin khan Gauhati High Court Divisional Bench chuan a ngaihtuah a; contempt petition thehluttute chu court thupek zah loa an puhte chu a mal te tea kohna pe turin a ti.
Vanglaini palai zawhna chhangin RT-PCR Lab. for Chhimbial ukil JC Lalnunsanga chuan, contempt of court-ah chuan sorkar official-te a mimal anga khin an nih thu a sawi a, "Ukil rawihna pawh a mimal anga sèn ngai leh hmingah pawh a mimal ang veka case put luh a ni," a ti.
Tarlan tawh angin, RT-PCR Lab. for Chhimbial-in June 2021-a Mizoram chhim lama RT-PCR khawl bun a nih theihna atana PIL an thehluhah Gauhati High Court chuan August 4, 2021 khan thutlukna a siam a; Lungleiah RT-PCR laboratory din tur leh hma la nghal turin Mizoram sorkar a hriattir a ni.
High Court chuan, judgement order chhuah aṭanga ni sarih chhungin Mizoram sorkara Health Secretary chu RT-PCR laboratory dinna tur ngaihtuahtu tur committee siam tur te, committee-ah chuan member pali aia tlem lo awm tur leh, member zingah YMA Sub-Headquarters, Lunglei President leh Lunglei Ṭhalai Pawl Chief Organiser telh ngei turin a hriattir a ni.
Mizoram sorkar chuan August 9, 2021 khan notification tichhuakin, Gauhati High Court, Aizawl Bench thupek angin Lungleia RT-PCR bun a nih theihna atana hma latu tur committee a din.
Committee-ah hian chairman chu Health & Family Welfare Principal Director a ni a, member secretary chu Hospital & Medical Education Director a ni. Member-te chu - Lunglei Civil Hospital Medical Superintendent, Lunglei Sub-Hqrs. YMA President leh Lunglei Ṭhalai Pawl Chief Organiser-te an ni.
Committee chu August 13, 2021 khan an ṭhukhawm a, Tourist Lodge, Lunglei chu RT-PCR bun lailâwkna atan sorkarah rawt ni se, an ti.
RT-PCR Lab. for Chhimbial chuan RT-PCR bun tura sorkar hmalakna duhkhawp loin, Court thupek zah lohna leh zawm duh lohna a awmah an ngai a, High Court-ah contempt of court petition an thehlut leh ta a ni.