Ráltlânte swab sample endik

Myanmar tualchhung buaina avangin Mizo­ramah ráltlân an rawn luh belh zel a, niminah pawh khan mi eng emaw zat an rawn luh belh leh nia thu dawn a ni. Thingsai lamah chuan nimin khan ráltlân rawn lut tharte swab sample endik a ni.

Chin state aṭanga rawn lut, Thingsai khaw chhung leh Ṭiau lui kam Bungkhawkaia awmte chu nimin khan Hnahthial Hospital aṭanga thawk chhuakte'n Rapid Antigen Test hmangin swab sample an endiksak a; Covid-19 vei an hmuh leh hmuh loh erawh hriat theih a la ni lo.

Thingsai aṭanga thu dawn danin, Myanmar aṭanga rawn lutte chu Bungkhawkaiah ni sarih chhung awmtir phawt an ni a, chumi hnuah Thingsai Primary Health Centre-ah swab sample endik a ni ṭhin.

Bungkhawkaia awmte chu Thingsai Raltlan Relief & Management Committee-in ei leh in tur bakah naupang lâwmte an pe ṭhin a; YMA Sub-Headquarters, Hnahthial chuan an huam chhungah ráltlân chhawmdawlna atan vehbûr an khawn mek a, tun kar chhunga pek hman an tum. Thing­sai MHIP-te pawhin an khaw chhungah ráltlânte tan thing, mutbu, thawm­hnaw leh bungbel an khawn khawm bawk.

Myanmar aṭanga ráltlânte awmna turin an luhna khuate chuan in (camp) an sa hlawm a, niminah pawh khan khaw hrang hrangah camp sain an hnatlang a ni.