Serlui-B kama lo leh huante titawp tura hmalak mek a ni

Serlui-B Hydro Electric Power (HEP) châwmtu Serlui kam, sorkarin mihring luah loh tura a tih huam chhunga huan/lo neite chu tawptir tura hmalak mek a ni.

Power & Electricity Secretary hnen aṭanga Vanglaini thu dawn danin, Serlui kam, HEP catchment area chu sorkarin mihring luah loh tura a humhalh leh a neitu hmasate hnenah zangnadawmna pek vek tawh a nih avangin catchment area chhunga thing leh maute tichereua huan/lo neih phal a ni lo. Chutih laiin, catchment area-ah huan/lo nei an awm nual avangin Kolasib DC hnenah hma la tura ngenna thlen a ni.

Kolasib district bawrhsap Dr H Lalthlangliana chuan Vanglaini palai zawhna chhángin, Serlui HEP catchment area-a huan/lo neite hriat chhuah hmasak a ngaih thu a sawi a, "Tute nge an nih kan hriat loh chuan hmalak ngawt a harsa a, chuvangin, HEP enkawltute leh Forest lamte pawh beráwnin huan/lo neia awmte list nei turin hma kan la mek," a ti a; catchment area-ah huan/lo neih khapna chu an kalpui reng thu a sawi.

Serlui-B HEP catchment area hi tuikhuahna aṭanga chhak lam tui chîm chin tàwp thleng (km. 53)-a thui a ni a, a khuahna lui kam lehlam lehlamah meter 292 huam chin a nih rualin, lui kam tlangdung awm dan azirin hmun ṭhenkhatah area zim leh zau lai deuh a awm thu PE department hotute chuan Vanglaini an hrilh.