Mizoramah Covid-19 vanga nu/pa chân naupang 92 an awm tawh

Mizoramah Covid-19 vanga nu emaw, pa emaw chán naupang kum tling lo 92 an awm tawh a, an zingah sorkar laipui scheme aṭanga ṭanpui thla tin Rs. 2,000 pek an awm nual tawh. Nu/pa-in an thihsan naupang la awm lohna district pali a awm.

Directorate of Women and Child Development (WCD) hnuaia Child Protection Services-in an chhinchhiah danin, Mizorama Covid-19 vanga nu emaw, pa emawin an thihsan naupang 92-te chu hmeichhia 49 leh mipa 43 an ni a; an zinga 89 chu nu emaw, pa emaw chán an ni a, naupang pathum dang chu Covid-19 lèn hmaa nu emaw, pa emaw thi tawh, Covid-19 lên hnua hripui vanga pakhat zawk chán leh an ni.

CPS-in an chhinchhiah danin, Covid-19 vanga nu/pa emaw zâwk zâwk chânte leh nu emaw pa thi tawh a enkawltu nu/pa chânte, he tehfung aṭanga tuartu zawng zawng hi naupang 92 an ni a, Aizawl district-ah mi 72, Champhai district-ah mi 9, Kolasib district-ah mi 4, Serchhip district-ah mi 3, Mamit district-ah mi 2, Siaha leh Lawngtlai district-ah mi 1 ve ve an ni. Covid hmaa nu emaw, pa emaw chân sa, covid hnua anmahni enkawltu nu emaw pa emaw chân leh hi mi pathum an awm a, Mamit, Aizawl leh Siaha district amite an ni.

Covid 19 vanga nu emaw, pa emawin a thihsan naupang 89-te chu chhungkua 42-a mi an ni a; Aizawl district-a mi tam berin, 72 an awm a, Champhai district-ah pakua, Kolasib district-ah pali, Serchhip district-ah pathum leh Siaha leh Mamit district-ah pakhat ve ve an awm. District pali - Lunglei, Saitual, Khawzawl leh Hnahthial district-ahte an la awm lo.

Covid-19 vanga thi nu/pate'n an thihsan naupang 92 zinga mi 20 chu CPS leh Juvenile Justice Fund aṭangin sponsorship kalpui a ni a; mi 20 zingah hian bank account leh ṭul dangte tihfel tawh mi 18 awmin, thla tin Rs. 2,000 pek tur a ni. Mi pahnih dang bank account pawh tihfel thuai a ni dawn tih CPS-a thawkte chuan an sawi. Naupang 20-te chu hmeichhia 11 leh mipa pakua an ni.

Naupang kum 6 hnuai lam chawṭha (nutrition) pek ngai 24 an awm a, chungte chu hmeichhia 14 leh mipa 10 an ni a; naupang 92-te chu counselling an pe vek tawh bawk. Vanglaini palai zawhna chhángin Child Protection Services (CPS) hotute chuan, Supreme Court thuchhuak bawhzuiin, Covid-19 kaihhnawiha naupang enkawltu thite chungchang an en zui ṭhin tih an sawi a; District Child Protection Unit (DCPU)-te nen Mizorama district hrang hranga naupang kum 18 la tling lote chanchin an zir chiang a, chhungkaw inrêlbàwlna leh sum lak luhnate thlenga an zir chian hnuah Child Welfare Committee (CWC)-in ṭanpui ngai nia a hriatte chu ṭanpuina pek ṭhin an ni tih an sawi.

Chawṭha (nutrition) pêk ngai an awmin an pe a, mi eng emaw zat chu a bik takin an kâwm (counselling) tawh tih an sawi a; lehkha an zir zawm dan pawh uluk takin an en zui tih an sawi bawk.