N Vanlaiphai-in zirtirtu ṭha an lawmpui

North Vanlaiphai VC huaihawtin nimin khan kumina India rama zirtirtu ṭha chawimawina dawngtu Jacinta Vanlalengzami, headmaster, A&M Grandchild School chawimawina leh lawmpuina hun hman a ni a; páwl hrang hrangin thilpek an hlân.

A&M Grandchild School-a inkhawm hi VC vice president F Lalremruata'n a kaihruai a; VC president Lalṭanpuia chuan, India rama mipui tam tak zingah zirtirtu ṭha chawimawina dawng tlak N Vanlaiphai khuain an nei chu ropui an tih thu a sawi a, "A inpekna a ropui hlein ka hria. Zirna piah lamah, a sikul compound leh huan a cheibàwl dante hi chawimawi phuin ka hria. Award hian zirtirtute eng emaw tala tiharhtu ni se ka duh," a ti.

Jacinta Vanlal­eng­zami'n in hmun a la neih loh avangin award dawn lawmpui nan N Vanlaiphai VC chuan in hmun an pe a; Joint YMA, MUP leh MHIP leh pawl dangte'n chawimawina thuchei an hlân bawk.

Lalṭanpuia sawi danin, N Vanlaiphaiah hian in ding 1,165 awmin, chu'ng zinga 826 chu mihring chenna (luah lai) a ni a; mihring 4,687 an cheng mek a ni.