Revenue Minister thu sawi a dik lo - Congress Ṭhalai

Mizoram Pradesh Youth Congress Commi­ttee (MPYCC) chuan, Land Revenue & Settle­ment (LRS) minister Lalruatkima'n Kolasib lamah LRS surveyor an tirh loh thu a sawi chu thu dik lo a nih thu an tarlang a; Vairengte-Sairang kawng four lane-a zauh turah zangnadawmna dawng turin dik takin an dawn an phût.

Nimina MPYCC thu­chhuah chuan, Natio­nal Highways & Infra­structure Develop­ment Corporation Limited (NHIDCL)-in Vairengte-Sairang inkara National Highway four lane an siam turah zangnadawmna chungchangah felhlel a awma an hriat avangin August 16, 2021 khan Kolasib-a LRS department leh Additional DC-te thil an zawt chiang tih an tarlang.

Congress ṭhalaite chuan, "Zangnadawmna dawngtu tur, a ram neitu­te'n sorkara thunei takte kaltlang kher lo hian an dawn tur dik tak dawng ngei turin kan phût. LRS Minister-in media kaltlanga surveyor an tirh loh thu a sawi hi a hmuna kala kan finfiahnaah, a thusawi hi thu dik lo a ni," an ti.

MPYCC tarlan danin, May 27, 2020-ah LRS department chuan notification tichhuakin, Vairengte-Sairang kawng four lane-a siam a nih dawn avangin a khawih tur ram chinah ram pass thar siam leh pass tihdanglam a khap a, chumi ang chuan Kolasib DC-in hriattirna a tichhuak nghal.

Sorkarin ram pass thar siam leh pass tihdanglam a khap laiin, sorkara thuneitute nena innghêng hnai tak nia insawite'n ram neitute an bia a, V/C pass chauh neitute chu an thlai tihchhiatah chauh zangnadawmna (crop compensation) an dawn theih dawn avangin, an VC pass chu periodic patta-a sorkar kaltlanga lehsak turin an bia a ni.

VC pass chu periodic patta-a leh a nih chuan, thlaiah chauh ni loin, ramah pawh zangnadawmna (land compensation) an la tel thei dawn a; VC pass neite periodic patta-a let tura buaipuitute'n zangnadawmna hmuh aṭanga 75% an dawng ang a, ram neitute'n 25% an dawng ang, tiin inremna (agreement) mi tam tak an ziahpui a ni.

MPYCC chuan, VC pass tidanglam a, periodic patta-a thlak theih a nih chuan, ram neitu dik takte'n a hlâwkna tél ngei se an duh thu an sawi a, "VC pass neitute hian mi dang kaltlang loin anmahni ngeiin an thlak remtihsak rawh se," an ti.