Hri donaah Mizoram sorkar a hlawhchham - ZPM party

ZPM party chuan thuchhuah siamin, hripui léng donaah rawtna hrang hrang vawi eng emaw zat an siam tawh tih an tarlang a, "Vawiin thlenga hri kaiin ziaawm lam pan aia kan la pung thúr thúr hi a pawi kan tiin, hri donaah Mizoram sorkar hi a hlawhchhamah kan ngai," an ti.

ZPM chuan, September 10, 2021-ah ZPM Legislature Party-in Aizawl Press Club-ah thuthar thehdarhtute an kawmnaa RT-PCR mobile van leh Covid-19 Delta strain chungchang an sawite MNF-in a ní là lãa an chháng nghal chu thil thleng khát tak a nih thu an tarlang a; ZPM press meet chhan lêt kawnga an ṭuan a rang ang bawkin kawng chhâwng, traffic jam awm lohna khawpui, nuai thum sem leh mipui hnena an thutiam tam tak tihhlawhtlin kawngah ṭuan rang turin MNF sorkar an phût.

MNF party thuchhuahin, 'Health department hian duhsaktute thilpek an hnar ngai lo,' tia an tarlan thu sawiin ZPM chuan, "Pu Lalduhoma’n RT-PCR khawl pek a tum an hnar te, Pu Zodintluanga’n RT-PCR a pek an hmang duh lo tlat leh political party huang páwn lama mite'n High Court-a an khin ngai hial khawpa an siam hnu pawha an la bawhzui ṭhat duh lohziate hi an theihnghilh tawh a ni mai thei. RT-PCR mobile van pawh a thlàwna dawn tur, pek inhuam an awm laiin, kawng dang an dap leh char char mai a lo ni àwm a, an thuchhuah khan hei hi a tichiang a ni," an ti.

India Formosa Foundation-in RT-PCR mobile van pek an duh thuin Chief Minister beng a thleng hlauh chu lawmawm an tih thu sawiin ZPM chuan, "A hriat veleh IFF hotute koin rang takin hma a la nghal a, CM-in a hriat veleh a bawhzui nghal hi a fakawm kan ti. CM beng thleng lo se a reh hlen dawn tihna pawh a ni àwm e," an ti a; RT-PCR mobile van neih thuai a, ṭangkai taka hman a nih theih nana hma latute duhsakna an hlan a ni.

ZPM tarlan dangte
 Thil nung inthlahchhawn dan (genome sequence) zir chianna National Institute of Biomedical Genomics - INSACOG-ah swab sample an thawn ṭhin a, GISAID database-ah an record ṭhin. GISAID database chu hri léng donaa zirchiangtute'n an rin leh behchhana an hman a ni.
 GISAID-in February 2021-ah Delta Variant kai Mizoramah mi paruk an awm tih a tarlang tawh a, Mizoram sorkarin a hre lo tlat hi thil mak a ni.
 ZPM-in Mizoramah Delta Variant a awm tawh thu thuchhuah hmanga kan puan aṭanga ni hnih hnu, June 18, 2021-ah Mizoramah Delta Variant a awm tih hriat a nih ruala puan nghal a nih thu an sawi. Sorkar thuchhuah tarlan danah, April 2021 daih tawh khan Delta Variant kai pali an awm tawh tih result aṭangin a lang.
 GISAID database tarlan February thlaa mi an hre lo a nih pawhin, April thlaa Mizorama Delta Variant awm thu June thla daiha an hre chauh mai hi a zialo.