Vaimim leh bêa hlawhtlingte chawimawi

Agriculture depart­ment chuan nimin khan Agriculture directorate conference hall-ah kum 2019-20 chhunga vaimim leh bê ching hlawhtlingte hnenah chawimawina an hlan a, Agriculture minister C Lalrinsanga'n a hmanpui.

C Lalrinsanga chuan, sorkar flagship ngai pawimawha theihtawp chhuahtute a lawmpui thu sawiin, "Ram hmasawnna atana pawimawh ber, thinlung lama intodelh tura harh tharna mipuiah nasa takin a thleng mek a, hnam anga din chhuahna min thlen ngei dawn a ni," a ti a; economic inde­pendence a thlen theih thu a sawi.

Agriculture Minister chuan, Assembly session zawh tâka an pawm, 'The Mizoram Agricultural Land Leasing Bill chu Mizo kut hnathawktute tan liau liau a nia sawiin, "Ni zung chakna (PM-KUSUM)-a tui pump-na hmangin thar chhuah tipung turin ṭhál buh chìnah hma­lakna kalpui tum a ni," a ti. Irrigation & Water Resources leh Coope­ration department-te nen coordination committee dinin, lui tui pump theih enfiaha leilet hmalakna kalpui tum mek a nih thu leh kum khata thlai thar tihpun nan hman ṭangkai a nih dawn thu a sawi bawk.

Sorkar thuchhuah tarlan danin, SEDP hnuaiah Agriculture department-in kum 2020 khan vaimim leh bê chi hrang hrang thar a pun theihna turin vaimim chìnna atan cheng nuai 212.74 a hmu a, district 11-a loneitu thlante'n vaimim quintal 13,010.83 an thar. Vaimim thar qtl. 13,010.83 aṭangin loneitute'n Rs. 2,47,20,577 vel an la lut anga chhût a ni.

Bê chi hrang hrang - chánâ, bekang, behliang leh bean-thute chìnna atana SEDP aṭangin cheng nuai 160.90 hmuh a ni a, ram hectare 944.73-a zauah chìn niin, quintal 4,870.33 thar a ni. Vaimim chìn leh tharah Saitual district pakhatna a ni a, ram hectare 109.26-a zauah vaimim qtl. 2,504 an thar. Pahnihna Aizawl district-ah ram hectare 82.96-a zauah vaimim qtl. 1,855.19 leh pathumna Lawngtlai district-ah ram hectare 121.40-a zauah vaimim qtl. 1,710.71 thar a ni. Farmers Interset Group zingah Saitual district-a Zawngina Hmarbawk zau chu pakhatna a ni bawk.

Be (pulses) chìn leh tharah Serchhip district pakhatna niin, ram hectare 349.04-a zuahah an chíng a, Champhai district leh Lunglei district chu pahnihna leh pathumna an ni. Kum 2020 chungin chánã qtl. 1,778.02, bekang qtl. 1,663.54, behliang qtl. 962.11 leh bean-thu qtl. 466.66 an thar a ni.