Covid-19 vei hmuh belh tam lamah State/UT 36 zingah Mizoram palina

Nimin zing lama sorkar laipuiin a tarlan danin, India rama state 28 leh UT pariat zingah Mizoram chu September 13, Thawhṭannia Covid-19 vei hmuh chhuah tam lamah palina a ni a; hripui vei enkawl mek tam lamah parukna a nih laiin, hripui vei hmuh chhuah tawh aṭanga enkawl mek percentage-ah a sáng ber.

September 13-a Mizoram aia Covid-19 vei hmuh belh tamna state pathum a awm a, chu'ngte chu - Kerala (mi 15,058), Maharashtra (2,740) leh Tamil Nadu (1,580)-te an ni.

Covid-19 vei enkawl mek tam lamah Mizoram chu India ramah parukna a ni a, Mizoram (mi 13,369) aia tamna state-te chu - Kerala (2,09,335), Maharashtra (53,427), Tamil Nadu (16,522), Karnataka (16,269) leh Andhra Pradesh (14,652)-te a ni.

Hripui vei hmuh chhuah tawh aṭanga enkawl mek tam lamah Mizoram chu India ramah sang berin, a sang fál hle a, 18.34% niin, Mizoram hnaih bertu Kerala-ah chuan 4.77% a ni. Pathumna Sikkim-ah 2.64% chiah a ni tawh thung.

September 13-a Covid-19 positive hmuh belh tam lamah Mizoram chu India hmarchhak state pariat zingah pakhatna a ni a, Mizoram dawta sang ber Assam-ah chuan mi 564 hmuh chhuah niin, Mizorama hmuh belh zatve pawh a tling lo a ni.

Hmarchhak state zingah Covid-19 vei enkawl mek Mizoramah tam berin, 13,369 an awm a, Mizoram dawttu Assam-ah mi 5,615 enkawl mek niin, Mizorama enkawl mek zatve a tling lo.

Hetih lai hian, Covid-19 vanga thi zatah erawh chuan India rama state zingah Mizoram a hniam ber thung a, thi zat percentage pawh a hniam ber. Mizoramah mi 241 an thi tawh a, Mizoram dawta thi tlemna ber Arunachal Pradesh-ah mi 270 an thi tawh a ni.