KHAWTHLIR

Thisen pe
Pachhunga University College NSS unit chuan nimin khan PUC campus-ah thisen pek an huaihawt a, Civil Hospital, Aizawl tan thisen unit 22 an pe a, petute mipa 18 leh hmeichhia pali an ni.

Bawlhhlawh sawiho
Aizawl mayor Lalrinenga Sailo kaihhruaiin nimin khan AMC conference hall-ah kawngpui siamna atana plastic bawlhhlawh (waste) hman ṭangkai dan tur sawiho a ni. AMC-a Solid Waste Management changtu executive councillor Laltlanzova Khiangte, Mizoram Road Fund Board Secretariat, AMC leh PWD hotute an tel a; plastic waste chu kawngpui siamna atana hman ṭangkai theih dan kawng dapa theihtawpa hmalak zel ni se, an ti.

Kuhva rah man
Serchhipa hmunpui nei Assam Rifles leh Champhaia Customs department mite chuan September 13, Thawhṭanni khan Khawbung leh Zawlsei inkarah Myanmar aṭanga lak luh nia hriat kuhva rah ip 780 an man a, Customs department-in an hrêng nghal. Kuhva rah an man hi Rs. 1,70,44,800 hûa chhût a ni.

Kolkata-ah Mizo thi
Cancer vei vanga Tata Hospital, Kolkata-a enkawl lai Laldingliana (65) h/o Vanlalpari Sailo (L), Bungkawn, Aizawl, Covid-19 vei ni bawk chu nimin zing dar 9:50 khan a thi. Thu dawn danin, Laldingliana hi cancer vangin Tata Hospital-ah enkawl a ni a, Covid-19 positive a ni tih August 23, 2021 khan hmuh chhuah a ni. Hripui vei a nih avangin thlawhtheihnain a ruang phurh a rem lo a, lirtheiin rawn hawpui mek a ni.

Minister Delhi-ah
Minister of state Robert Romawia Royte chuan sorkar laipui hotute dàwr turin nimin khan New Delhi a thleng a, Ports, Shipping and Waterways minister Sarbananda Sonowal a kâwm nghal. Inkawmnaah hian Mizoram mamawh thil hrang hrang an sawi a; Sarbananda Sonowal chuan, ṭawngkaa rawtna a neihte chu ziaka pe turin a hrilh a, tihpuitlin dan kawng a zawnpui tur thu a lo hrilh.