Covid-19 vangin mi 4 thih belh

Nimin khan Mizoramah Covid-19 vei mi pali an thi. Sorkar chhinchhiah angin nimin tlai dar 5 thleng khan Mizoramah Covid-19 vangin mi 245 thi tawhin an zinga 28 hi tun September thlaa thi an ni.

Doris Lalbiakmuani (16) d/o H Lalhruaitluanga, ITI Veng chu nimin zing dar 9 khan State Referral Hospital (ZMC)-ah Covid-19 vangin a thi a, nimin khan vui a ni. Covid-19 positive a ni tih September 9 khan hmuh chhuah a ni a, September 10-ah SRH-ah dah luh a ni. ITI Veng YMA hruaitute chuan Doris Lalbiakmuani hian natna dang a nei sa lo tih an sawi.

Covid-19 vei C Romawii (75), Seling chu nimin chawhma dar 10 khan SRH-ZMC panpui a nih laiin kawng lakah a thi. Amah hi Covid-19 positive a ni tih nimin zing khan hmuh chhuah a ni a, nimin zing vêk khan SRH panpui nghal ni mah se, thleng hman loin kawng lakah a thi a ni.

Lalnunmawia (44) h/o Ramchhanthangi, Bethlehem Veng pawh nimin chhun dar 12:30 khan Covid-19 vangin SRH-ZMCah a thi. Covid-19 vei a ni tih September 7 khan hmuh chhuah a ni a, September 13 khan SRH-ah dah luh a ni. Lalnunmawia hi natna dang nei sa a nih thu leh Covid-19 vaccine dose khatna la tawh a nih thu, thu dawnna chuan a sawi.

Nimin tlai dar 3 khan PC Liansangpuii (41), Zemabawk North pawh hripui vangin a thi a, hripui vanga thi 245-na a ni. Covid-19 positive a ni tih September 12 khan hmuh chhuah a ni a, nimin chawhnu khan SRH-ZMC panpui niin, a thi zui a ni.